بلوچستان نا بنجائی شار شال ئٹ بلوچ سیاسی بندی تا خاہوت آک پریس کلب نا مونا برانز اڈ تسنو۔ برانز ئے ایسر کننگ کن پولیس نا کنڈ آن ساندہ نا وڑ تاغت کاریم ئٹ ہتنگا۔
بلوچ یکجہتی کمیٹی نا شنگ کروک بیان نا رد ئٹ ڈاکٹر ماہ رنگ بلوچ، صبغت اللہ شاہ جی، بیبگر بلوچ، گلزادی بلوچ، بیبو بلوچ و ایلو سیاسی بندی تا بے قانودی و بے آئینی دزگیری نا برخلاف اوفتا خاہوت آک شال پریس کلب نا مونا برانزی کیمپ اڈ تسنو۔
اسہ پین بیان ئسیٹی پاننگا کہ پاکستانی پولیس شال پریس کلب نا پیشن سیاسی بندی تا خاہوت آتا کنڈ آن اڈ تروک تولوک برانز نا کیمپ ئے تاغت نا زور آ ایسر کننگ نا کوشست کرے۔
بیان ئٹ پاننگا کہ قانود نافذ کروکا کارندہ غاک برانزی کیمپ ئنا گدان و ایلو مڈی تے دوئی مسر و برانز ئٹ اوار خاہوت آتے فریشان کریر و بیم ئنا گواچی کریر۔ دا بلوچستان ئٹی پاکستانی ریاست نا ودوکا زوراکی تا اسہ پین مثیل ئس ءِ۔
بی وائی سی نا کنڈ آن پاننگا کہ دا برانزی کیمپ نا مسخت ریاستی زوراکی تا برخلاف توار بُڑز کننگ و بندی تا دمدستی آجوئی نا خواست ءِ۔ سیاسی باسک آتے بیدس آئین دزگیر کننگ بندغی حق آتا سخت لتاڑ ءِ۔
