برانزی گدان ئے اینو کوئٹہ پریس کلب نا مونا 5652 دے مس۔ قلات آن بروکا سیاسی و چاگڑدی جہدکار محمد ایوب بلوچ، بدل خان بلوچ و در محمد بلوچ گدان آ بسّر اواری نا درشانی کریر۔ شیرزمان نا مار عبدالغفار نا خاہوت ہم بس زوراکی ئٹ بیگواہ کننگوک عبدالغفار نا بیگواہی نا حوال ئے پہَو کرفے، و خواست کرے کہ اودے سلامت یلہ کننگہ۔
عبدالغفار ئے سریاب روڈ کلی بادینی چوک آن 19 نومبر 2024 نا شام چھار ئہ نیم آ ریاستی فوج زور ئٹ بیگواہ کرے، مہالو آن ہم نعمت اللہ پِنیئو اونا مار ئس فوج بیگواہ کریسس۔
وی بی ایم پی نا وائس چیئرمین ماما قدیر بلوچ تران کرسہ پارے کہ دا جنگ آسراتی کھٹنگ کن نہ بلکہ بلوچ نا بقا نا جہد ءِ، دہنو ہزار آ مثال آک اریر کہ بلوچ ورناک تینا روزگار و ہست مننگ کن نہ بلکہ تینا وطن کن کاٹم آ کفن تفسہ بش مسّنو۔ ریاست دا اُست آن درینے کہ ہڑدے اسہ ورنا سے نا لاش ئے مَش، پٹ یا جھل تیٹ خسّنگک، انت دا شہید آتا لمہ آتہ گڑاس زر تننگ آن اوفتا چُناک ولدا ملّنگ کرور؟ دا پیرنگا لمہ، باوہ آتہ ہمو وخت آ جارات رسینگو ہراتم وطن ئٹی بندغی نا شرف و بریبری مرو۔
ماما قدیر بلوچ پارے کہ زندان آتیٹ ہزار آ بلوچ ورناک ریاست نا سزا تہ سہنگ ئٹی ءُ، اگہ سزا کنوکا ہزار آ ورناک سرکاری آسراتی ہلکرہ تو شہید متوسہ، اگہ دا ورناک بہا مسّرہ تو اینو دافتا لمہ باوہ، ایڑ، ایلمک شال، کراچی یا اسلام آباد نا پریس کلب نا مون آ اوفتا عکس آتہ ہفسہ برانز کتورہ۔ ہنوکا پنچ سال آن تینے جمہوری حکومت پاروکا اخس زنک ایسری، زور ئنا بیگواہی و ایلو غیر فطری وسیلہ آتیٹ زوراکی کننگ ئٹی ءِ، شائد کہ پین کس ئس بلوچ راج آ کروک مرے۔ دا پِن ئنا جمہوری حکومت بلوچ زنک ایسری ٹی ہندنو بھلو بندغ پُھلانے ہرا بلوچ راج ئے آسراتی تیان زیات دوست اسّر۔
