ایران نا نیم سرکاری میڈیا ادارہ تسنیم نیوز تینا شنگ کروک رپورٹ ئسیٹی پارینے کہ پاکستانی فوج و ڈھکوک ادارہ آک بلوچستان ئٹی بلوچ آجوئی خواہوک تنظیم آتا برخلاف کارروائی کننگ کن ڈیتھ اسکواڈ آتے کاریم ہلنگ ءُ، و افغانستان نا مُست ئنا فوجی کارندہ غاک بھلو کچ ئسیٹی ڈیتھ اسکواڈ تیٹی اوار مسُنو۔
06 اگست آ شنگ مروکا رپورٹ ئٹی پاننگانے کہ بلوچستان ئٹی ڈیتھ اسکواڈ پاکستانی فوج ئنا مُختفی ئٹ کاریم کننگ ءُ و فوجی آپریشن تیٹی ہم اوار ءُ۔ ڈیتھ اسکواڈ نا کارندہ غاک کِرا نا فوجی تا دروشم ئٹ کاریم کیرہ و ریاستی ادارہ تیتون اوار مننگ تون اوار پاکستانی فوج ئنا کارروائی تیٹی ہم بشخ ہلیرہ۔
رپورٹ نا رد ئٹ افغانستان نا مُست ئنا فوجی کارندہ غاک بھلو کچ ئسیٹی 2021 آ جمہوری سرکار نا ایسر مننگ آن پد افغانستان ئے الِسا پاکستانی فوج ئنا ادارہ تا ڈیتھ اسکواڈ تیٹی اوار مسنو۔ افغانستان نا مُست ئنا فوجی کارندہ تے اوار کرسا پاکستان ئے دا آسراتی رسینگک کہ اوفک مُست آن فوجی تربیت ہلکنو و بلوچستان ئٹی پاکستانی فوج ئنا ڈیتھ اسکواڈ تا نفری گیشتِر مریک۔
رپورٹ ئٹی دا ہم پاننگانے کہ مُست ئنا افغان فوجی کارندہ تا بنیاتی مسخت مالی کمک و تینا زند ئے گدریفنگ ءِ۔
