تُربَت آن پاکستانی لشکر نا ڈھکوک ادارہ تا کارندہ غاتا دو آن زوراکی ئٹ بیگواہ کننگوک دلوش بلوچ ولد محمد کریم و لطیف بلوچ ولد گل محمد نا خاہوت اوفتا آجوئی کن توار بڑز کننگ نا خواست کرینے۔
خاہوت آک پارینو کہ نن اول آن کیلکور نا جہی مسنُن داسہ تُربَت آسکانی آ توسنُن ، ننا چُناک 21 مئی 2026 آ عید ئکن بازار آ سامان ہلننگ کن ہنانو ہموکان دزگیر کرسہ بیگواہ کننگانو ۔
او پاریر کہ ننا چُناتا زوراکی ئٹ بیگوائی ئے دہ دے مسُنے ولہ داسکان اوفتا بارو ئٹ ننے ہچو سرپندی ئس تِننگ متنے کہ ننا چُناک ہرانگ ءُ و امر ءُ۔ ہراڑان ننا خاہوت آک فریشانی نا گواچی ءُ۔
خاہوت آک سرکار آن خواست کرینو کہ ننا چُنا تیا ہمرو ہم دوبہ ئس ارے گُڑا مونا ہتننگ مریر و عدالت آ پاش کننگ مریر ، اگہ بے میار ءُ گُڑا زوت آجو کننگ مریر ۔
اوفک انسانی حق آتا ادارہ غاتیان خواست کرینو کہ ننا چُناتا آجوئی کن توار بڑز کننگ کن تینا کڑد ئے ادا کیر۔
