بی این ایم نا چیئرمین ڈاکٹر نسیم بلوچ چاگڑدی میڈیا نا سائیٹ ایکس آ تینا شنگ کروک بیان ئسیٹی پارے کہ نن جلات ولد عبدالقادر بلوچ نا کذیت آ سخت پریشان اُن، دا سخت انگا ساعت ئٹی نن اونا خاہوت، سیال و سنگت آتون اوار اُن۔ جلات بلوچ نا عمر بیرہ 17 سال اسک۔
چیئرمین ڈاکٹر نسیم تینا بیان ئٹی مُستی پارے کہ جلات بلوچ نا باوہ، عبدالقادر بلوچ بلوچ نیشنل موومنٹ نا ہرینا باسک ئسے۔ جلات بلوچ ، پنی آ رہشون ڈاکٹر اللہ نذر نا ایڑ ئنا مار ءِ، دا خاہوت بلوچ راجی جہد ئٹی بھاز قربانی تسنے۔ جلات نا کذیت آن مُست اونا ایلم منصور بلوچ راجی آجوئی نا جہد ئٹی 2020 ئٹی شہید مسس۔
چیئرمین ڈاکٹر نسیم بلوچ پارے کہ ڈاکٹر اللہ نذر و اونا خاہوت نا تاریخی جہد، استقامت و قربانیک بلوچ جہد ئٹی اسہ اہم ءُ بشخ ئس نشان تیرہ۔ دُن انگا رہشونک و خاہوت آک تینا عزم، نظر و قربانی تیٹ نہ تنیا راج بلکن تاریخ ئے سِدّھا ءُ نیمہ ئس دیرہ۔
چیئرمین نسیم بلوچ پارے کہ ہندا سوب آن بی این ایم اسہ شفاف و جوانو نیمہ ئس ہننگ ءِ ہراڑے رہشون تا سیاسی پام، مُر ہُننگ و چرجوئی ئٹ جہد اونا سوگو انگا طاقت ءِ۔
چیئرمین ڈاکٹر نسیم بلوچ ایسر ئٹ پارے کہ نن اسہ وار ئس پدا جلات بلوچ نا کذیت آ غم و رنج ئنا درشانی ئے کرسا دعا کینہ کہ اللہ اونا خاہوت ئے دا کبین انگا ساہت آ صبر و طاقت ایتے۔
