بلوچستان نا ضلع کیچ ئنا ہند بلیدہ ٹی اِرا ورنا نا جشوک جونک خننگانو۔
جون تا حالیت بھاز خراب مننگ نا سوب آن او درست متورہ واہم جیب آتیان دُو تموک شناختی کارڈ آتا کمک ئٹ جون تا چاہنداری مسنے۔
جون تیان اسٹ نا چاہنداری معراج ولد شیر محمد، گلی بلیدہ نا جہی و ایلو نا چاہنداری طلال احمد ولد عبدالرشید نا پن ئٹ مسُنے۔
خاہوت نا ردئٹ معراج ئے پاکستانی لشکر 5 ستمبر 2025 آ بلیدہ آن تربت آ سفر نا وخت آ دزگیر کریسس۔ دا وخت آ ساڑی بندغاتا ردئٹ اوڑا بیدادی آن گڈ پاکستانی لشکر اودے تینتو دریسس۔ ہراڑان پد اینو اونا جون خننگانے۔
