05 مئی 2026 آ شال آن زوراکی ئٹ بیگواہ کننگوک آ محمد ریاض ساتکزئی نا خاہوت وی بی ایم پی نا گدان آن پریس کانفرنس کرسا پارینے کہ ننا چُنا ریاض ساتکزئی ئے اندا سال ئنا 05 مئی آ ہمو وخت آ زوراکی ئٹ بیگواہ کننگانے کہ او وین ئٹی شال آن ہننگ ئٹی مسونے۔ ایف سی کارندہ آک اودے مستونگ نا ہند دشت ڈغاری چوکی آن دزگیر کننگ آن پد بیگواہ کرینو۔
خاہوت نا پاننگءِ کہ ریاض نا زوراکی ئٹ بیگواہی ئے داخس توو گدرینگ آن پد ہم اونا ہچو حواک ئس اف۔ نا او آجو کننگ مریک نا خاہوت ئے اونا بابت ئٹ سرپندی ہیترہ۔ نن تینا چُنا نا آجوئی کن ایف سی تون اوار سرکار و ایلو ادارہ غاتا ہنان اُن، داخس جُہد آن پد ہم ننے ریاض نا بابت ئٹ ہچو سرپندی تننگ افس۔
خاہوت خواست کرینے کہ محمد ریاض ساتکزئی زوت آجو کننگ مرے یا خاہوت ئے اونا بابت ئٹ سرپندی تننگ مرے۔ اگہ ریاض آ امرو ہم دوبہ ئس ارے عدالت ئٹی ہتنگ مرے اودے تینا صفائی نا حق تننگے۔ امرو ہم شاری ئس مرے اودے دا وڑ بیگواہ کننگ خاہوت ئے حال تفننگ اونا خاہوت ئے گیشتر پریشان کیک۔
خاہوت ایسر ئٹ حوالکار آتے کلہو ترسا پارینے کہ ننا اُمیت ننا زیہاٹے نُم ننا توارئے سرکار اسکان سر کننگ کن تینا کڑدارئے ادا کیر۔
