بلوچستان نا جتا جتا غا علاقہ تیٹی سلاہ بند کاروائی تا اِرا تدینی رپورٹ مسُنے ہرافتیٹی اسہ سلاہ بند بندغ ئسے دزگیر کرینو ، ایلو کاروائی ٹی پولیس نا چوکی آ جلہو کرسہ سرکاری سلاہ تے درینو۔
اولی تدینی نوشکی ٹی مس ہراٹی سلاہ بند بندغ آک کسر آ ناکہ بندی کریسُر ۔ ہندا وخت نثار پنی ءُ اسہ بندغ ئسے گاڑی آن دڑفسہ دزگیر کننگ آن گُڈ نادرست ءُ جہہ ئسے آ دریر۔
حوال تا رد ئٹ دا بندغ آ شک مسنے کہ سرکار نا مُخ تفی ٹی کاریم کروک سلاہ بند( ڈیتھ اسکواڈ) نا کارندہ ئس ءِ۔
ایلو نیمہ غا ، ضلع گْوادر نا تحصیل جیونی نا ہند پانوان ئٹی اسہ بھلو سیکیورٹی سقم ئس خننگاسس۔
رپورٹ نا رِد ئٹ سلاہ بند بندغ آک پانوان ئٹی پولیس نا چیک پوسٹ آ جلہو کریر ہراڑے پولیس کارندہ تے دزگیر کرسہ سرکاری مڈی و سلاہ تے دریر۔
جیونی ٹی مروک تدینی ٹی ہچو جانی نسخان یا کارندہ تا ٹپی مننگ نا حوال مونا بتنے۔
