بلوچستان وومن فورم نا پارہ غان لمّہ وطن کریمہ بلوچ نا شہیدی نا چھارمیکو سال دے آ اسہ تعزیتی ریفرنس ئس اڈ تننگا۔ دا وختا تقریب ئٹ زالبول باسک آتون اوار زند ئنا جتا شعبہ تیان تعلقداری تخوکا بندغ آک بھلو کچ ئسیٹ اوار اسر۔
تران کروکا لمّہ ءِ وطن شہید کریمہ بلوچ نا زند، اونا تروکا سبخ، جہد و قربانی تیا روشنائی شاغِسہ اونا کردار ئے دروت ندر کریر۔
تران کروکا پاریر کہ شہید بانک کریمہ بلوچ، ہرا بی ایس او آزاد نا اولیکو زالبول چیئرپرسن اس، او تینا جہد ئنا زریعت ئٹ بلوچ زالبول تِہ توار تسنے و بندغی حق آتیکن خواری کشانے۔
تعزیتی ریفرنس ئٹ تران کروکا پاریر کہ شہید کریمہ بلوچ نا جہد نہ بیرہ بلوچستان بلکن تیبہ جہاں ئٹ مظلوم آ الس کن کسر نشان تروکو چراغ ئس ءِ۔ اونا قربانیک ننے حق ئنا جہد ئنا اہمیت نا سبخ ایترہ۔
یاتی مرے کہ بانک کریمہ بلوچ بھلو وخت ئس بلوچستان ئٹ تینا جہد ئے برجاء تخنگ آن گڈ 2016 ئٹ کینیڈا غا ہناسس، ہراڑے او جلاوطنی نا وخت ہم بندغی حق آتیکن کاریم کننگ اس و 22 دسمبر 2020 ئٹ کینڈا ٹی شہید کننگا۔
ریفرنس نا ایسر ئٹ مجلس ئٹ اوار مروکا “لمّہ ءِ وطن” شہید کریمہ بلوچ نا جہد ئے برجاء تخنگ نا عزم ئنا درشانی کریر۔
