زوراکی نا بیگواہی تا برخلاف وائس فار بلوچ مسنگ پرسنز نا بین برانزی گدان شال پریس کلب نا مونا اینو 5675 دے مس۔ اینو بی ایس او نا جہدکارک بسّر اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ ہڑدے، ہر تُو محکوم کن اسہ وڑ ءِ، ہڑدے جون ئس خننگک، اسہ اُرا سے نا چراغ ئس کھئیک۔ ایلو تُو تیان بار دا تُو ئٹی ہم جون خننگانے، زوراکی ئٹ بیگواہ کننگانے یا ریاستی جہی لشکر (ڈیتھ سکواڈ) نا دو آن سیاسی جہدکار تِہ ٹِک کننگانے۔
ماما قدیر بلوچ پارے کہ ظلم و زوراکی، لشکرکشی، زوراکی نا بیگواہی و بےقانودی خلّنگ سامراجی کوزہ گیری ئے برجاء تخنگ کن ءُ، ہرافتا کمک ئٹ ہر وخت قانود، پارلیمنٹ و ریاست مملکت آن بارنگا رنگی آ پِن تیٹ سامراجی فکر ئے مونا ہتنگک۔
او مُستی پارے کہ بلوچ زنک ایسری، لشکرکشی، چھاپہ، ٹِک کننگ خلّنگ، زور ئنا بیگواہی و جون خسّنگ زیات مسّنے، مچا دنیا نا نوشتہ کروکاک، صحافی و بندغ دوست آ پلک آک بلوچ راجی سوج آ گیشتر نوشتہ کیرہ۔ سوگو آ ادارہ غا تا کمک ئٹ محکوم آتا جہد و کاٹم تا قربانی سامراجیت ئے پد بِٹور، دا وخت ئٹی ہراڑے تینا وطن آ بلوچ راج ئنا جان و مال و عزت رکھوک اف۔
