بلوچستان نا جتا ہند آتیٹی بلوچ سرمچار آک پاکستانی فوج آ جلہو کرینو و کسر تا ناکہ بندی کننگانے۔
حوال تا رد ئٹ استو سرمچار آک بھلو کچ ئسیٹی منگچر بازار ئٹی پاکستانی فوج ئنا چوکی ئسے آ جلہو کرینو ، دا وخت آ اِرا مُسہ گھنٹہ اسکان علاقہ ٹی سُمکاری برجاء مسُنے۔ ہندن گمان مریک کہ پاکستانی فوج ئے جانی نسخان ہرفوئی تمانے۔
ہندا وڑ آواران نا علاقہ جھاؤ ٹی سرمچار آک درو ویگ ئنا شش بجہ غا جھاؤ ڈولیجی ٹی پاکستانی فوج ئنا چوکی ئسے راکٹ لانچر و ایلو سلاہ تیتون ٹِک کرینو۔ دا جلہو ئٹی ہم فوج ئے جانی نسخان رسینگ نا حوال ارے۔
ایلو نیمہ غا خضدار نا ہند وڈھ ئٹی بلوچ سرمچار آک وڈھ ئنا بھلا کسر آ فوج ئنا کاروان ئسے ٹِک کرینو، کاروان ئٹی اسہ بکتر بند لاری ئس تُد مسُنے۔
جلہو ئٹی کاروان ئٹی اوار اِرا لاری بھس مسنو، ہرافتیٹی سوار انگا کارندہ آک خلنگانو و ٹپی مسنو۔جلہو آن پد فوج ئنا ہیلی کاپٹر آک جلہو جاگہ غا سر مرسہ تینا خلنگوک و ٹپی مروک آتے درینو۔
ایلو نیمہ غا کیچ ئنا ہند بلیدہ سوراپ ئٹی سلاہ بند بندغ آک اُرا ئسے آ جلہو کرینو۔ دا جلہو استو مسلم پنی ءُ بندغ ئسینا اُراغا مسُنے، جلہو ئٹی مسلم ولد حمل تون اوار چار بندغ ٹپی مسنو، ٹپی مروکا بندغ آتے علاج کن اسپتال آ درینو ہرافتے آن مسلم بیران مسُنے۔
مسلم نا بارو ئٹ ہندُن پاننگِک کہ او مُست بلوچ سلاہ بند تنظیم ئسینا باسک مسُنے پدا فوج ئنا مونا سرنڈر کرینے و داسا ڈیتھ اسکواڈ نا سربر ئس مسُنے۔
ہندا وڑ واشک نا ہند رخشان ئٹی بلوچ سرمچار آک بھلو کچ ئسیٹی کسر تا ناکہ بندی کرینو۔
حوال تا رد ئٹ سرمچار آک اینو سوب ئنا پنچ ءُ نیم بجہ غا رخشان ئٹی کاسگ ڈور ئنا پہل آ ناکہ بندی کرسا اسہ گھنٹہ ئسے اسکان ہن ءَ بر کروکا لاری تے پٹ ءَ پول کرینو۔
دا جلہو تا ذمہ واری تے داسکان ہچو تنظیم ئس ہرفتنے۔
