بی این ایم نا بندغی حق آتا ادارہ پانک پنجگور ئٹی زوراکی ئٹ بیگواہ کننگوک آ بندغ آتا کوش ئنا مذمت ئے کرسا پارینے کہ پنجگور نا ہند چیدگی آن پنچ جون دو تمانے، ہرافتیٹ مُسہ جون آتا چائنداری پیر جان ولد کچکول، شعیب بلوچ و مدثر نا پن تیٹ مسنے۔
ترجمان پارینے کہ شعیب بلوچ ئے پاکستانی فوج 08 فروری 2023 آ دزگیر کرسا بیگواہ کرینے، پیر جان ئے 10 جون 2026 آ بیگواہ کننگانے، مدثر ہم مُست آن زوراکی ئٹ بیگواہ کننگاسس۔ پین اِرا جون تا داسکان چائنداری متنے ولے پن کروک آ مُسٹ انگا بندغ آتے پاکستانی فوج مُست آن زوراکی ئٹ بیگواہ کرسا پدا خلکُنے۔
پانک بلوچستان ئٹی برجاء انگا نسل کشی آ اوسوز نا درشانی ئے کرسا پارینے کہ زوراکی ئٹ بیگواہ کننگوک آ بندغ آتا جون تا خننگ و پدا پاکستانی فوج ہندا دعویٰ کیک کہ دا بندغ آک آپریشن یا جنگ ئسیٹی خلنگانو۔ دا خلنگ مروکا بندغ آتا بابت ئٹ پٹ ءَ پول کننگ مرے، کُل جون تا چائنداری کننگے و اوفتا ڈوہدار آک قانون نا رد ئٹ سزا تننگ مریر۔
پانک پاکستانی سرکار آن خواست کرینے کہ زوراکی ئٹ بیگواہی تا لڑ بند کننگ مرے، زوراکی ئٹ بیگواہ کننگوک آ بندغ آتا بابت ئٹ سرپندی تننگ مرے، دزگیر کننگوک آ بندغ آتے عدالت تیٹی ہتنگ مرے تانکہ اوفتے قانود نا رد ئٹ انصاف تننگے۔
پانک خواست کرسا پارینے کہ اقوام متحدہ و جہانی ادارہ آک مداخلت کرسا پاکستان آ زور شاغِر تانکہ بلوچستان ئٹی زوراکی ئٹ بیگواہی و غیر قانودی کوش آتا لڑ بند کننگ مرے۔
