پنچمیکو بشخ
نوشتہ کار: خلیل بلوچ
مٹ و بدل: راسکوہ بلوچ
جسم ئٹی کمزور فکر ئٹ تکڑئی اوڑا ختم
پند خواری سگ ءُ سینہ سنگتی اوڑا ختم
ننا سرکل نا کل سنگت آک ہبکہ و حیران اسُّر۔ بارگ کنا نیمہ غا ہُرا و ای میرل نا نیمہ غا، ولے میرل بھاز فریشان اسک۔ تینا جوڑ تے گٹ ہَلنگ اسک۔ پارے”ای چاؤسُٹ دُن مریک، ہمو دے اودے ای تینتون ہیسوٹہ۔ ہائے زندگی! سما اف انت سختی و سوری تیتون مون پہ مون ءِ۔”
پاکستان نا ٹارچر سیل آتا قصہ غاتے نن مُست آن بِنگُسون۔ اسہ نیمہ غا نزور بالاد آ رگو جان اَس کہ دشمن نا دوٹی اَس، و اِرٹمیکو نیمہ غا کنا مِلی ٹی وڑ وڑ نا خُلیفوکو خیال بَننگ اسّک، ولے نن کل اُست اُستجم اسُن کہ رگو جان نا وڑ ءُ سوگو فکر ءُ بندغ ئسے ریاست تنیا بدنی اذیت تننگ کیک، اونا پولات آ فکر ئے پِرغنگ کپک، نئے کہ تنظیمی راز ئس کشنگ کیک۔
دہ دے آن پد سنگت ئس نیٹورک آ ہِناسک و واپسی آ مخننگ ئٹ بس و حال تِس کہ رگو یلہ مسنے۔ اسہ جہدکار ئسیکن خوشی نا وخت ہرا مریرہ، دا ہمو خوشی تیان گیشتر اَس کَنکِن۔ میرل جان ہموتم کُچین ئس خیرات کرے۔ نن بھاز خوش مسُن کہ ننا ہمکوپہ ءُ سنگت ئس تارمہ غا زندان آن آجو مسنے۔
نن کل ہُروک اَسُّن کہ ہراتم رگو جان حال احوال کیک، و نن ہراتم اونا کچاری ئے ہَلینہ۔ خبر اف اول نا وڑ ئٹ سوگو ءِ یاکہ لٹ ءَ کُٹ آک اودے نزور کرینو؟ ولے او فکری دروشم ئٹ مش ئس اَس، راسکوہ نا شتک ءُ تلار ئس اَس کہ پِننگ نا پِن ئے تِتوکہ۔ پانزدہ دے گدرینگتوسک کہ او کلہو کریسک کنے دوئی مبو، ای داسہ مش آ بریوہ۔
میرل جان اودے وس کریسک کہ نے جاگہ ئس مون ایتنہ تینا علاج ئے کرک، ولے او بیدس مش آن پین جاگہ غا ہِننگ کِن تیار الّو۔ گڑا ننا سرکل نا سنگت آتا ہندا سلاہ مس کہ مش آ ہتنگ مرے، میرل و بارگ اونا دو ہلنگ کِن اونا رند ئٹ ہِنار۔
دا ہمو وخت اَس کہ شور پارود ئٹ قمبر خان و ریاستی ڈیتھ اسکواڈ سخت ایکٹو اَس۔ شور پارود نا حالیت آک سخت اسُر، ولے بلوچ کِن اسہ بھلو مستائی ئس ہندا اَس کہ بھلو وخت ئسیان پد بی ایل اے و بی ایل ایف نا سنگت آک اسہ جاگہ غا اسُر۔ اَسِٹ آ وتاخ و کیمپ ئٹ زُنڈوک اسر کہ مونی اتحاد (اشتراک عمل) نا گامگیج و پدا براس نا پِن ئٹ اسہ جہہ آ اوار مسُّر۔
او پوسکن مش آ بَسس، رگو جگاڑ و سمیر آن اونا پن کامران مس۔ ولے ہمو اولی دے آ بدل مس کہ بارگ جان ئے سوج کریٹ کہ دانا پن ئے دیر کامران کرینے؟ گڑا بارگ جان پارے۔” داڑتون کامران تَمپک، بائدہ ءِ دانا پن کے ڈی مرے۔” گڑا ہمو دے آن پد اونا پن کے ڈی مس۔
ریاست نا تارمہ غا زندان و سختیک اودے بدنی دروشم ئٹ سخت نزور کریسُر، ولے فکر تہ سوگو اَس۔ اولی دے آن اونا جہد و جفا بنا مسّس، ای شام آن ہُروک اَسُٹ کہ زندان نا قصہ غاتے خف تورِو۔
برجاء ءِ۔۔۔۔۔۔۔۔
