بی این ایم نا بندغی حق آتا ادارہ پانک مستونگ نا ہند کھڈ کوچہ ٹی پاکستانی فوج ئنا ہیلی کاپٹر آتا سُمکاری آن مُسہ بندغ ئے شہید کننگ و ارٹ ئے ٹپی کننگ نا مذمت ئے کرسا پارینے کہ دا بندغ آک باغ آتیٹی مزوری کننگ ئٹی مسُنو، پین جنگ ئسیٹی اوار متنو۔
پانک ئنا رد ئٹ خلنگ مروکا تیٹی بادا نواسانی ولد خیردین تُد ءِ ہرا تینا پیر انگا باوہ نا اسٹ انگا مار ءِ۔ ایلو خلنگ و ٹپی مروکا بندغ آک بگٹی نا ٹک شالوانی آن سیالی تخرہ۔
پانک ئنا رد ئٹ جہانی بندغی حق آتا رد ئٹ لس شاری تا جان و مال ئے رکھوئی ءِ۔ فوجی کارروائی تا نیام ئٹ اگہ لس بندغ آک خلنگ مریرہ گُڑا دا تدینی نا بابت ئٹ دلجمی ئٹ پٹ ءَ پول کننگ مریک، دافتا ذمہ وار آک قانون نا رد ئٹ جُست کننگ و ہلنگ مریر و خاہوت آتے انصاف تننگے۔
پانک سرکار آن خواست کرینے کہ دا تدینی نا بابت ئٹ زوت پٹ ءَ پول کے و دانا ذمہ وار تا برخلاف کارروائی کے و بروکا وخت ئکن دُن انگا تدینی تیٹی لس شاری تا رکھنگ کن گامگیج ہرفے۔
