بی ایل ایف نا ترجمان میجر گہرام بلوچ میڈیا ٹی شنگ کروک بیان ئسیٹی پارے کہ ننا سرمچار آک 09 جولائی 2026 آ سوگو ءُ کارروائی ئس کرسا تیبہ چاغی شار ئے تینا گھیرہ ٹی ہلکُر۔ سرمچار تا اول و رکھوک آ بشخ آک چاغی شار ئنا ہن ءَ بر تون مشی ہند و اہم انگا جاگہ آتا پوزیشن ہلِسہ کارروائی ئے بناء کریر۔ شار ئنا تہہ و پیشن نا کسر تیا پوزیشن ہلِسہ ناکہ بندی کروک آ سنگت آک چاغی نا اہم انگا کسر تیا عارضی چوکی خلکُر و کسر تیا مشکوک انگا لاری تے پٹ ءَ پول کریر تانکہ فوج ئنا کمک تون اوار فوج و مخبر آتا ہن ءَ بر ئے تیبہ بلاک کننگے۔
ترجمان پارے کہ گھیرہ نا سرسوبی آن پد سرمچار تا جتا انگا گوریلہ بشخ آک چاغی شار ئٹی پیہار و اوفک پولیس، لیویز تھانہ، بینک و ایلو سرکاری جاگہ آتیا اسہ جاگہ جلہو کریر۔ کاروائی نا وخت ساڑی انگا پولیس کارندہ تے دزگیر کرسا سرسوج کننگا۔ پولیس کارندہ تے راجی جہد آجوئی نا برخلاف کوزہ کروک فوج ئنا کمکار جوڑ وے مننگ و راج دشمن کاریم تیان مُر مننگ نا سختی ئٹ پاریر۔ دُنکہ پولیس کارندہ آک ہچو بلوچ دشمن کاریم ئسیٹی اوار الوسُر ہندا سوب آن جنگی اصول، اخلاقیت و بندغی نا رد ئٹ کُل کارندہ تے سلامتی ئٹ یلہ تننگا۔ کاروائی نا وخت سرمچار آک پولیس تھانہ نا سرکاری سلاہ تے ہم ضبط کریر۔
ترجمان گہرام بلوچ پارے کہ دا آپریشن نا وخت کوزہ کروک پاکستانی فوج ئنا کارندہ آک پیش قدمی نا کوشست کریر گُڑا مُست آن سنگر ہلوک آ سرمچار آک بھلا و خودکار سلاہ تیئٹ پاکستانی فوج آ جلہو کریر ہرانا سوب آن دشمن فوج پدی مرسا اوکان نرنگ آ مجبور مس۔
بی ایل ایف نا ترجمان بیان ئٹی مُستی پارے کہ دا کارروائی نا اصل مسخت چاغی نا وڑ ءُ اسہ اہم ءُ اسٹریٹیجک ءُ شار ئسے تینا کنٹرول ئٹی کرسا جہان نا مونا کوزہ کروک ریاست نا عمل داری نا دروغ انگا دعویٰ تے وے پڑدہ کننگ و دا نشان تننگ اسک کہ بلوچستان ئٹی اصل عمل داری کوزہ کروک پاکستانی ریاست نا افک بلکن سرمچار آتا ءِ۔ دا کارروائی ئٹ نن ریاستی شراکت دار و ملٹی نیشنل کمپنی تے دا کلہو ئے تننگ خواہنہ کہ اوفک تینا مال تے کوزہ کروک نا دروغ انگا بھروسہ آتیان داڑے خلنگ آن پہریز کیر۔
ترجمان گہرام بلوچ ایسر ئٹ پارے کہ بلوچستان نا سرزمین آن کوزہ گیر فوج آتا تیبہ پیشتمنگ و آجوئی اسکان سرمچار تا فیصلہ کن جلہو آک مُستی ہم پین ترندی ئٹ برجاء مرور۔
