بلوچ نیشنل موومنٹ نا بنجائی ترجمان تینا شنگ کروک بیان ئسیٹی پارینے کہ پارٹی تینا عظیم آ راہشون،مسکوہی بنجائی سیکریٹری جنرل شہید ڈاکٹر منان بلوچ و اونا سنگت "شہدائے مستونگ” بابو نوروز، اشرف بلوچ، حنیف بلوچ و ساجد بلوچ ئے اوفتا شہیدی نا سال دے آ سِخت، شرف و عہدِ وفا ئٹ خراجِ عقیدت پیش کیک۔
او پارے کہ ڈاکٹر منان بلوچ نا زند و شہیدی بلوچ قومی جہد ئنا ہمو روشن آ باب ئنا نمائندگی ئے کیک ہراٹی راج آتا آجوئی کن کڑد، قربانی و راستی ئے زند ئنا معیارِ گؤندنگک۔ او بیرہ اسہ بندغ ئس الو، او اسہ فکر، اسہ کسر و جہد ئنا عظیمو سبخ ئس اسک و اندا فکر ئنا چرجوئی اینو بی این ایم نا نت تے سیاست و مزاحمت نا پڑ آ سوگو تخانے۔
او ودیک پارے کہ بی این ایم پھاش وڑ ئٹ دا ہیت آ باور کیک کہ شہید آتا قربانیک پھوک مفرور۔ ڈاکٹر منان بلوچ و اونا سنگت شہید آتا دتر ننا راجی دیہاڑ نا ہمو چراغ ءِ ہرا غلامی نا تہاری تیٹ ننے کسر شان ایتک۔
ترجمان پارے کہ نن دا قول ئے بھیرو ایتنہ کہ ڈاکٹرمنان بلوچ و اونا سنگت آتا قربانی نا بھرم ننے آجوئی نا دروشم ئٹ الم رسینگو و مزل اسکان سر مننگ اسکان اوفتا دتر نا روشنائی ننا راہشونی ئے کرو۔ ننا جہد وختی درعمل ئس اف، اسہ مرغنو، اصولیئو و نظریاتیئو سفر ئس ءِ، ہرا نا اساس شہید آتا تُغ، قربانی و قوم ئنا اشتماعی اومیت ءِ۔
بیان ئٹ ترجمان بی این ایم نا غُٹ زون و چیپٹر آتے پنت تس کہ او شہید ڈاکٹر منان بلوچ و اونا سنگت شہید آتا سال دے ئنا رد ئٹ یاتگاری پروگرام اڈ ایتر۔ دا پروگرام آتیٹ شہید آتا سیاسی و فکری کڑد، اوفتا جہد ئنا مسخت و آجوئی نا مزل اسکان بی این ایم نا ذمہ واری تیا روشنائی شاغر۔
ترجمان ایسر ئٹ پارے کہ پارٹی تینا غٹ باسک و بلوچ قوم آن خواست کیک کہ او شہید ڈاکٹر منان بلوچ و اونا سنگت آتا مشن ئے تینا اشتماعی ذمہ واری پُہہ مریر۔ شہید آتے خراج تحسین پیش کننگ نا کُل آن گچینا وڑ اندادے کہ نن تینا نظریہ، پارٹی و جہد ئے سوگو کین۔
