بیگواہ کننگوک آ ڈاکٹر دین محمد بلوچ نا مسٹر و بندغی حق آتا باسک سمی دین چاگڑدی میڈیا ٹی شنگ کروک ویڈیو کلہو ئسیٹی پارے کہ اودے ہنوکا اسہ تو آن و داسا ہم دزگیری و قید ئنا تڑی تننگ مننگ ءِ۔
او تینا کلہو ئٹی پارے کہ اودے دا ویڈیو ئے تینا باوہ نا زوراکی ئٹ بیگواہی نا 17 می سال دے پورو مننگ آ ریکارڈ کروئی اسک واہم تڑی و دباؤ نا سوب آن او دا ویڈیو ئے اسہ دے ئس پد شنگ کرینے۔
سمی دین تینا درشان ئٹی پارے کہ ہنوکا شام اونا اُرا آن پیشن سیکیورٹی فورسز نا لاریک بسنو، اونا بابت ئٹ سرسوج کرینو و اودے تنگ کننگ نا کوشست کرینو۔ اونا پاننگ اسک کہ او ہنوکا 17 سال آن تینا باوہ نا زوراکی ئٹ بیگواہی آن پد مشکل، دباؤ و پریشانی تیتون مون تننگ ءِ۔
او پارے کہ اودے مُست ہم دزگیر کرسا جیل کرینو واہم اونا ہمت پنتنے، اونا رد ئٹ او تینا باوہ نا آجوئی و انصاف کن کُل ہڑاند آتیتو مون ترو۔
سمی دین مُستی پارے کہ او مُدام ناانصافی نا برخلاف توار بُڑز کرینے و اگہ ہندا بنیات ئٹ اودے دزگیر کننگ مریک گُڑا او جیل ئٹی تینا باوہ تون اوار ایلو بیگواہ کننگوک آتیکن توار بُڑز کرو۔
او خواست کرے کہ اونا باوہ ئے آجو کننگ مرے و کُل بیگواہ کننگوک آتا خاہوت آتے انصاف تننگ مرے۔
