آئرش حکومت بلوچستان ئٹی سول سوسائٹی نا باسک آتا دزگیری آ فریشانی نا درشانی ئے کرے, آئرلینڈ نا وزیر خارجہ پارے کہ اوفک دا علاقہ ٹی بندغی حق آتا حالیت آ نظر تخانو۔
سئے شمبے 13 مئی آ آئرلینڈ نا وزیر خارجہ و تجارت، سائمن ہیرس، پارلیمان باسک پال مرفی ٹی وی نا سوج ئنا نوشتئی ورندی ٹی بلوچ بندغی حق آتا باسک آتا دا زوت ئٹ مروک دزگیری تیا فریشانی نا درشانی ئے کرے۔ دا دزگیر مروکا باسک آتیٹی ڈاکٹر ماہ رنگ بلوچ، بیبو بلوچ، گلزادی بلوچ، بیبرگ بلوچ و صبغت اللہ شاہ جی اوار ءُ۔
سائمن ہیرس تینا ورندی ٹی پارے کہ آئرلینڈ ئے بلوچستان ئٹی برجاء دزگیری و بدامنی نا سما ءِ۔
او پک کرے کہ اسلام آباد ئٹی آئرش سفارتخانہ دا حالیت آ نظر تخانے و یورپی یونین نا ڈل و ایلو جہانی شریکدار آتا موثر انگا سفارتی رد عمل کن سَلاح کننگ ءُ۔
او پارے کہ آئرلینڈ نا بندغی حق آتا رکھ و شابیت تننگ تون سیالی پاش ءِ، او دا ہیت آ زور تس کہ درشان نا آجوئی، پُرایمن مُچی، تنظیم سازی و سیاسی اواری کون آ اصول آک آئرلینڈ نا پاکستان تون اِرا کُنڈی سیالی تا ماس( بنیاد) ءِ۔وزیر ہیرس مونی پارے کہ بندغی حق آتا ویل یورپی یونین و پاکستان نا سیالی ٹی بنجائی حیثیت تخک۔
او پارے کہ نومبر 2024 ئٹی مروکا بیست و چھارمیکو پاکستان و یورپین یونین نا اواری ئٹ کمیشن نا حوالہ تس ہراڑے جمہوریت، طرز حکمرانی و بندغی حق آتا شیف ئنا دُھرک کیہی اہم معاملہ آتیا تینا خیال آتا درشانی کریر۔
او دا ہم پارے کہ دا بندغی حق آتا خلیس آک تجارتی و GSP ہیت خاص وڑ ئٹ پاکستان ئے تننگ مروکا آسراتی نا سیاق و سباق ئٹی ہم زیر غور بریرہ۔
یات مرے کہ داسا زوت بلوچستان ئٹی سیاسی باسک آتا دزگیری آ جتا ڈیہہ و جہانی بندغی حق آتا تنظیم آتا پام تننگانے ہرافتا پاننگ ءِ کہ دا علاقہ ئٹی اختلاف رائے توننگ کن زوراکی ئٹ بیگواہی، تڑی و بیدس جواز آن دزگیری کونو چم بازی کاریم ئٹ ہتنگک۔
