لبنان پیجر فون و واکی ٹاکی تا ترخنگ آن حزب اللہ تینا سینزدہ سنگت نا کھئینگ ئے پک کرینے و پارینے کہ دافتا ذمہ وار اسرائیل ءِ۔
لبنان ئٹی ایران تون تفوک لشکر ‘حزب اللہ’ نا برخلاف اول پیجر و پدا واکی ٹاکی تراک آتیٹ دائسکان “سی و دو” بندغ خلّنگانے۔
لبنانی جانجوڑی نا وزارت نا رد ئٹ چھار شمبے آ واکی ٹاکی تا ترخنگ نا سوب آن بیست بندغ کھسکنے ہندن چھار سد و پنجاہ آن گیشتر ٹھپی مسنو۔
جہانی خبر تروک ادارہ ‘بی بی سی’ نا رد ئٹ داکان مہالو سئے شمبے نا دے حزب اللہ نا باسک آتا پیجر آتا ترخنگ آن اِرا چُنا تون اوار دوانزدہ بندغ کھسکُسر و اِرا ہزار ہشت سد بندغ ٹھپی مسوسر، ہرافتیٹ ایرانی سفیر ہم اوار ءِ۔
حزب اللہ دا جلہو آتا زمہ وار اسرائیل ئے پارینے ولے اسرائیل نا پاسو آن دا بارت ئٹ دائسکان ہچّو حوال مونا بتنے۔
سئے شمبے نا شام اٹکل سئے ءَ نیم آ لبنان نا بھاز آ جاگہ غا تیٹ پیجر ترخنگ آن تراک آتا بِناء مس، دائسکان دا پھاش اف کہ اخس پیجر ترخانے۔
خبر تروک ادارہ ‘روئٹرز’ نا پاننگ ءِ کہ تراک آک اسہ گھنٹہ ئسیکان مرسہ کرینو، ہراڑان پد زوت مُچا لبنان نا اسپتال آتیٹ ٹھپی آتہ سرکننگانے۔ لبنانی وزیر جانجوڑی نا پاننگ ءِ کہ پیجر آتا ترخنگ ئٹی گیشتر بندغ آتا مون، دُوک یا پِھڈ آک ٹھپ مسنو۔
ولے حزب اللہ نا میڈیا آفس نا پاننگ ءِ کہ چھار شمبے آ مروکا واکی ٹاکی نا تراک آتیٹ شانزدہ سال ئنا مار ئسے تون اوار اونا سینزدہ جہدکار خلّنگانے۔
ایلو کُنڈ آ سئے شمبے آ مروکا پیجر تراک آتیان کھئوکا تیٹ اِرٹ حزب اللہ نا اِرا پارلیمنٹ نا باسک ئنا مارک ءُ، اوفتا پاننگ ءِ کہ حزب اللہ نا اسہ باسک ئسے نا مسڑ ئس ہم کھسکنے۔ ٹھپی آتیٹ لبنان ئٹی ایران نا سفیر مجتبیٰ امانی ہم ارے۔
لبنان نا جہی آ میڈیا نا حوال تا رد ئٹ گڑاس علاقہ ٹی اینو ہم تراک آتا توار نا ڈس مسّنے، ہراڑان پد فوج مخلوق ئے دہنا اوزار آتیان مُر مننگ تون اوار شک ئٹی شاغوکا گِڑا تا حوال ئے ہمو وخت آ فوج ئے تنّنگ نا پارینے۔
