نوبل داد ئنا گودی و بندغی حق آتا باسک ملالہ یوسفزئی بلوچ یکجہتی کمیٹی نا راہشون ماہرنگ بلوچ نا دزگیری آ فریشانی نا درشانی کرینے۔
او تینا چاگڑدی حوالکاری میڈیا اکاؤنٹ آ شنگ کروک درشان ئسیٹ پارینے کہ ای ماہرنگ بلوچ نا دزگیری آ فریشان و فکر مند اٹ، ماہرنگ لکھ آ بے توار آ بندغ آتا نمائندگی ئے کیک ہرا زالبول و چناک بلوچستان و خیبرپختونخوا ئٹ بندغی حق آتا لتاڑ تون تننگ ءُ۔
او پارے کہ برانز کننگ و نزور آ بندغ آتیکن توار ارفنگ اونا حق ءِ و اودے زوت آجو کننگ مرے۔
ملالہ یوسفزئی پارینے کہ ای ماہرنگ بلوچ تون اوار سلوک اُٹ۔
ملالہ یوسفزئی نا درشان ہموتم مون آ بسک ہراتم ماہرنگ بلوچ و بلوچ یکجہتی کمیٹی نا ایلو راہشون تِہ پولیس دزگیر کرینے، دا گام ئنا ملالہ تون اوار ایلو بندغی حق آتا باسک آک مذمت کرینو و بلوچ باسک آتا زوت آجوئی نا خواست کرینو۔
بندغی حق آتا جہانی تنظیم ایمنسٹی انٹرنیشنل ہم ماہرنگ بلوچ نا دزگیری نا مذمت کرِسہ پاکستانی کالخواہ تیان خواست کرینے کہ او ماہرنگ بلوچ و ایلو دزگیر کننگوک بندغ آتِہ زوت آجو کیر و بلوچستان ئٹ برجاء تینا مرضی آ دزگیری تِہ بند کیر۔
ماہرنگ بلوچ و سنگت آتا دزگیری آن بندغی حق آتا باسک و تنظیم آتا کنڈان ردعمل ودی مسنے، ہرا پاکستان ئٹ درشانی نا آجوئی و پر ایمن برانز نا حق آ سوج ارفیرہ۔
دا اولی وار افک کہ ملالہ یوسفزئی ماہرنگ بلوچ نا مختفی ئے کرینے۔ داکان مُست ہم او ماہرنگ نا بندغی حق آتیکن کروکا کوشست آتا ستا ئے کرینے و اونا کاریم تِہ مننگ آ زور تسنے۔
ملالہ نا پاننگ اسک کہ ماہرنگ بلوچ نا کاریم تِہ منّوئی ارے نئے کہ اودے توننگ نا کوشست مرے۔
ماہرنگ بلوچ نا دزگیری و اوڑا ملالہ یوسفزئی تون اوار ایلو بندغی حق آتا باسک آتا فریشانی پاکستان ئٹ بندغی حق و درشانی نا آجوئی نا ویل ئے اسہ وار ئس ولدا ارفینے۔
