بلوچ یکجہتی کمیٹی نا سروک صبیحہ بلوچ چاگڑدی حوالکاری میڈیا غا اسہ اہمو جہانی گھامگیج ئسے نا بارو ئٹ سرپندی تسنے، اونا رد ئٹ جہان نا 20 تنظیم تون اوار پنی آ ماحولیاتی کاریم کروک گریٹا تھنبرگ و برطانیہ نا پارلیمنٹ نا باسک جان میکڈونل اسہ اوڑدئی چھٹی ئسے آ دستخط کرینو، ہرا اقوام متحدہ نا بندغی حق آتا ہائی کمشنر وولکر تُرک آ رادہ کننگانے۔
دا چھٹی ٹی اقوام متحدہ آن خواست کننگانے کہ او پاکستان آن بلوچ الس ئنا برخلاف برجاء ریاستی زوراکی و بندغی حق آتا لتاڑ نا ورندی ہلے و بلوچ یکجہتی کمیٹی نا دزگیر کروک باسک و سروک آتا دمدستی آجوئی کن گھام کرفِہ۔
چھٹی ٹی نوشتہ اہم ٹِک آک:
چھٹی ٹی 21 مارچ آ شال ئٹ اسہ پرامن برانز ئسے آ پاکستانی سیکورٹی لشکر نا بیدادی ئے شیف خلنگا، ہراٹی کم آن کم مُسہ بندغ، ہرافتیٹ اسہ چُنک سن مار ئس ہم اوار اس، شہید و کیہی برانزیک ٹپی کننگار۔
برانزیک زوراکی ئٹ بیگواہ کننگوک بندغ آتا آجوئی نا خواست کریر، ولے اوفتیا لٹ کُٹ کننگا، آنسو گیس خلنگا و اوفتِہ دزگیر کننگا۔
چھٹی ٹی پاننگا کہ دا دزگیر مروکا تیٹ ڈاکٹر ماہ رنگ بلوچ ہم اوار ءِ، ہرا زوراکی نا بیگواہی و بلوچ الس ئنا برخلاف ریاستی تادی تا برخلاف اسہ سوگوؤ توار ئس ءِ، جیل ئٹ او بے بندغی روشت، گندہ غا ورغ و جانجوڑی آسراتی تا مفننگ نا سوب آن ناجوڑ مسنے۔
اوڑا نظر تخنگ کن اونا کوٹی نا پیشن و غسل خانہ نا خُڑک آ کیمرہ خلنگانے، ہرا اونا پرائیویسی نا لتاڑ ءِ، اونا بندی ہند ڈھکوک ایجنسی تا دوٹی ءِ، و اونا خاہوت ئے اوڑدئی نا موکل تننگ افس ہراڑان اونا ساہ ئے خطرہ ءِ۔
چھٹی ٹی سمی دین بلوچ نا کراچی ٹی دزگیری و اودے بیم ئنا گواچی کننگ نا زکر ہم ارے، ہرادے دروغ ئنا دوبہ غا تیٹ اِرا وار دزگیر کننگا و یک اپریل آ آجو کننگا، چھٹی ٹی پاننگا کہ دا نیامٹ پین کیہی بندغ دزگیر کننگا و زوراکی ئٹ بیگواہ کننگا۔
بلوچستان ئٹی ریاستی زوراکی و جہانی چُپی:
چھٹی ٹی پاننگا کہ تیبہ بلوچستان ئٹ الس ریاستی بیدادی تیان پد ہم چرجوئی ئٹ کسر تیا برانز کننگ ءِ و تینا خواست آتیان پدی مننگ اف، ولے پاکستانی ریاست جہانی تاغت آتا چُپ انگا مُخ تفی آن دا برانز آتا ورندی ٹی پین زیات بیدادی، دزگیری و زوراکی کننگ ءِ ہرا بیرہ برانزی تیا آخہ بلکہ بندغی شرف و بنداوی حق آتیا ہم جلہو ءِ۔
دا ہم پھاش کننگا کہ شال ئٹی جلہو بیرہ اسہ تدینی ئس اف بلکہ بلوچ الس ئنا برخلاف کیہی دہک آن برجاء ریاستی پالیسی تا بشخ ءِ، 1948 ئٹی بلوچستان ئے زور ئٹ تینتو اوار کننگ آن پد ریاست کوزہ، لشکر کشی و زنک ایسری نا پالیسی آ کاریم کننگ ءِ ہرا نا رد ئٹ ہزار آ بندغ آتے زوراکی ئٹ بیگواہ، بیدس عدالت خون کننگانے ہرا دستاویز آتیا ہم ثابت مسنو۔
ریاستی انسداد بغاوت نا حکمت عملی ٹی تینا مون بمباری، معاشی بند تفنگ، و بنداوی حق آتا منظم لتاڑ اوار ءِ۔
قدرتی مڈی تا ریاستی و پیشن ڈیہی استحصال بلوچ الس ئے نیستی تا گواچی کرینے، تہہ ئنا نوآبادیاتی نظام و بیدادی بلوچستان ئے جہان نا غُٹ آن زیات عسکری و مظلوم علاقہ آتیان اسٹ جوڑ کرینے۔
جہانی خواست آک:
چھٹی نا ایسر ئٹ دستخط کروکا بلوچ الس و بلوچ یکجہتی کمیٹی تون اوڑدئی نا درشانی کرسا منَہ خواست کرینو ہرافتیٹ ڈاکٹر ماہ رنگ بلوچ، بیبوں بلوچ، سبغت اللہ بلوچ، گلزادی بلوچ، بیبگر بلوچ، و ایلو غُٹ دزگیر کننگوک باسک آتا دمدستی آجوئی نا خواست اوار ءِ۔ اندن خواست آتیٹ زوراکی نا بیگواہی و ریاستی بیدادی تا ایسری و پاکستانی لشکر نا بلوچستان آن تیبہ پیشتمنگ نا خواست ہم ارے۔
