بلوچستان ئٹی اِرا اہمو کسر تدوکا 10 دے آن بند ءُ، الس، تاجر و ٹرانسپورٹر آتا مشکل آتیٹی ودکی مسنے۔ ٹرانسپورٹر و کاروباری تپہ ئے دے ئنا کروڑ آتا نسخان مننگ ءِ۔
کوئٹہ چیمبر آف کامرس نا صدر محمد ایوب مریانی نا پاننگ ءِ کہ کسر تا بند مننگ نا سوب آن تاجر آتے بیرہ کنٹینر ڈیمریج چارج ئنا اسہ لکھ امریکی ڈالر ( تقریباً مُسہ کروڑ 36 لکھ کلدار) نا نسخان مننگ ءِ، ایلو مالی نسخانک انگہ جتا ءُ۔
بی این پی نا پارہ غان ڈاکٹر ماہ رنگ بلوچ و بی وائی سی نا ایلو زالبول باسک آتا دزگیری نا برخلاف 28 مارچ آ وڈھ آن کوئٹہ نا پارہ غا لانگ مارچ بناء کننگاسس، واہم حکومت برانزی تے کوئٹہ ٹی پیہنگ کن ایلیتو۔
بی این پی مستونگ ئٹی لکپاس نا جہہ آ اِرا بھلا کسر تیا برانز کننگ ءِ۔ حکومت ہم لانگ مارچ نا برانزی تے مونی توننگ کن لکپاس ٹنل ئٹ کنٹینر سلیفسہ و کھڈ خلِسہ کسر ئے بند کرینے۔
دا برانز ئٹ و حکومتی ہڑاند آتا سوب آن اِرا بھلو کسر 28 مارچ ئنا نن آن بند ءُ ہرافتیٹ پاکستان ئے ایران تون اوا کروکا کسر این 40 و کوئٹہ ئے کراچی تون گھنڈوک این 25 کسر اوار ءِ۔
کوئٹہ چیمبر آف کامرس نا صدر ایوب مریانی نا پاننگ ءِ کہ ایران آ ہنوکا کسر نا بند مننگ نا سوب آن 1200 آن زیات مال دروک لاری گھٹ مسنو ہرافتیٹ 847 باؤزرز ہم تد ءُ، ہرا ایل پی جی و پیٹرول پاکستان آ ہتنگ ءُ۔ ہر اسہ لاری آ دے ئنا تقریباً 100 ڈالر نا "کنٹینر ڈیمریج چارچ” مننگ ءِ۔
اونا پاننگ اسک کہ کوئٹہ ٹی این ایل سی ڈرائی پورٹ آ ایران آ ہنوکا پٹاٹہ و برنج آن پُر 200 لاری سلیسنو ہرافتیٹ ساڑی گڑاک زوت خراب مرور۔
دا گِڑا تے ہندی مارکیٹ ئٹی سودا کننگ منکن اف انتئے کہ خواست مفننگ نا سوب آن نہاد آک کم ءُ۔
بلوچستان نا کُل آن بھلا ٹرانسپورٹ نا خواجہ حاجی مظفر علی لہڑی نا پاننگ اسک کہ بدامنی و کسر تا تفنگ آن ٹرانسپورٹ تپہ غاک بھلو جیڑہ ئسے تون مون پہ مون ءُ۔
اونا پاننگ اسک کہ “ تدوکا مسہ تُو آن ننا کاروبار زہمی ءِ ولے دا 10 دے آن تیوہ غا بند ءِ۔“
حاجی مظفر علی نا پاننگ اسک کہ “مستونگ آن گدرینگوک آ شال ئے کراچی تون گھنڈوک کھل آن بھلا و خاص ئنگا کسر ہندادے۔ داکان ننا 12-15 اسکان لاریک گدرینگارہ ولے داسہ بیرہ مسہ لاری، سبی، جیکب آباد، سکھر آن کارہ۔ ایلو سندھ آن ہنوکا کسرک ءُ ہراکہ بھلن و مُر ءُ۔ او کسر آن 200 لیٹر آن زیات ڈیزل خڑچ مریک و کرایہ غاک ہم کم از کم 2000 اسکان ودانو، ہندا سوب آن او کسر تیان مسافرک سفر کپسہ۔
کھل ٹرانسپورٹ و بس، ویگن ایلو کیہی لاری تا خواجہ غاتا پاننگ اسک کہ ننا سد آتا کچ ئٹ اُلاخ آک سلوک ءُ۔
اوفتا پاننگ اسک کہ حکومت زوت دا کسر تے مَلے و برانز نا پر ایمنو حل ئس کشے۔
