بلوچستان نا دریابی شار گوادر نا تحصیل پسنی ٹی زیرو پوائنٹ نا ہند آ بیگواہ غا سیاسی باسک آتا آجوئی کن برانز برجاء ءِ وختس کہ کسر بند مننگ نا سوب آن ہڑتما کنڈ آن کیہی مسافری گاڑیک گھٹ مسنو۔
پسنی ٹی بلوچستان نیشنل پارٹی (بی این پی) نا پبلیکیشن سیکرٹری، وحید مجید، و اونا ہڑتما ایلم تا آجو مفرنگ نا برخلاف احتجاجی برانز ترند مسنے۔
بی این پی و بیگواہ غا بندغ آتا خاہوت آتا پارہ غان پسنی زیرو پوائنٹ آ برانز کرسا کسرک بند کننگانو۔
برانزیک کُل ٹرانسپورٹر تیان خواست کرینو کہ اوفک تینا الاخ آتہ کسر تیا ہتپس تاکہ ننا برانزی مہم ئٹ تعاون مرے۔
یات مرے کہ تدوکا ہفتہ وحید مجید ئے اونا مسہ ایلم تون اوار پاکستانی لشکر اُراغا چھاپہ خلسہ بیگواہ کرے۔ واہم اونا اسہ ایلم ئس آجو مس ولے وحید مجید و اونا اِرا ایلم دائسکان بیگواہ ءُ۔
داکان مہالو حق دو تحریک نا سروک آتون گپ تران آن گڈ برانز وختی دروشم ئٹ ایسر کننگاسس ولے آجو مفرنگ نا دروشم ئٹ داسا ولدا برانز بناء کننگانے۔
برانز کروکا زوت سرکار آن کاروائی و بیگواہ غا بندغ آتا آجوئی نا خواست کرینو۔
