حوال تا رد ئٹ ضلع لسبیلہ نا شار وندر آن پاکستانی لشکر چھار شمبے نا دے اسہ دکاندار ئسے اونا اُراغان زوراکی ئٹ بیگواہ کرینے۔
بیگواہ کننگوک بندغ ضلع خضدار نا ہند کریشہ نا جہی سبزل نا مار زاہد بلوچ نا پن ئٹ چاننگانے۔
خاہوت نا پاننگ ءِ کہ زاہد اسہ دکاندار ئسے و کاروبار کن کیہی وخت آن وندر ئٹی جہی مسنے۔ اوفک خواست کریر کہ زاہد نا آجوئی کن ننا توار جوڑ مبو۔
ایلو کنڈ آن کیچ ئنا علاقہ تمپ آن یک و نیم سال مُست پاکستانی لشکر نا دو آن زوراکی ئٹ بیگواہ کننگوک اسرار نا خاہوت، بندغی حق آتا تنظیم آتیان خواست کرینے کہ اونا رکھوک آجوئی کن توار بڑز کیر۔
او پارینو کہ اتااللہ نا مار اسرار تمپ ئنا ہند کونشکلات نا جہیس ءِ ہرادے پاکستانی لشکر 13 مارچ آ اُراغا چھاپہ خلِسہ بیگواہ کرے و دائسکان اونا ہچ ڈس اف۔
او پاریر کہ اونا زوراکی نا بیگواہی آن ننا مُچا خاہوت ڈکھ آتا گواچی ءِ۔ سال ئس و شش تُو گدرینگ آن گڈ ہم ننے اونا بارث ئٹ ہچو حوال رسینگتنے کہ او اراڑے و امر ءِ۔
خاہوت نا پاننگ ءِ کہ نن اسرار نا آجوئی کن اسلام آباد و تربت ئٹ برانز کرین و اونا آجوئی نا خواست کرین، ولے انگہ اونا آجوئی کن ہچو گھامگیج متو۔
او کُل بندغی حق آتا تنظیم آتیان خواست کرینو کہ اسرار نا آجوئی کن توار بڑز کرسا اودے آجو کرفنگ ئٹ کمک کیر۔
