بلوچ نسل کشی و بیگواہ بندغ آتا آجوئی کن اسلام آباد ئٹی بیگواہ آ بلوچ آتا خاوت آتا نیمہ آن بلوچ یکجہتی کمیٹی نا بھلُنی ٹی اسلام آباد نیشنل پریس کلب نا مونا برانز برجاء ءِ۔
بلوچ یکجہتی کمیٹی نا رہشون ڈاکٹر ماہ رنگ بلوچ برانز جاگہ آن چاگڑدی میڈیا نا سائٹ ایکس آ پارے کہ ہنوکا کیہی دے تیان اسلام آباد پریس کلب نا مونا کالخواہ تہ دیہان ئے تینا نیمہ ہتنگ کن خاوت آتا پُر ایمن برانز برجاء ءِ واہم کالخواہ آک برانزی تے پریشان کننگ کن جتا جتا ءُ توجیل کارمرز کننگءُ۔
ماہ رنگ نگراں وزیراعظم انوار الحق کاکڑ نا ہنوکا دے ئنا ہیت آتا حوالہ ئٹ پارے کہ وزیر اعظم ہرا ملک ئنا سربراہءِ او پُر ایمن برانزی تے دہشت گرد آتا ہمدرد پارسا ننے تڑی تننگ بناء کرینے۔
ماہ رنگ پارے نن 20 دسمبر آن اسلام آباد ئٹی اُن کُل سرکاری ادارہ آک بیگواہی تے توننگ و بالاچ مولا بخش نا قاتل آتے دزگیر کننگ آ اثر مند ثابت مننگ افس، ہرادے تربت ئٹی سی ٹی ڈی نا دو آن دروغ ئنا مقابلہ ٹی خلنگاسس۔
او پارے کہ اقوام متحدہ نا وڑ انگا جہانی ادارہ آتا نیمہ ہننگ آن بیدس پین کسر اف و کس ئس ننے اسلام آباد ئٹی اقوام متحدہ نا دفتر نا مونا برانز اکن توننگ کپک۔
