زوراکی ئٹ بیگواہ کننگوک دلجان بلوچ نا ایڑ آواران نا ڈپٹی کمشنر نا دفتر نا مونا وے پک مروک وخت اسکان بین برانز بناء کرینے، ہرا نا مسخت اونا آجوئی نا خواست ءِ۔
دلجان بلوچ نا خاہوت نا رد ئٹ اودے 12 جون 2024 آ پاکستانی لشکر اونا اُراغان دزگیر کننگ آن گڈ بیگواہ کریسس، و دائسکان اونا ہچ ڈس اف۔
اونا آجوئی کن برانز 18 نومبر آ بناء مس، و خاہوت نا بندغ آک و جہی مخلوق آواران نا بنجائی کسر تِہ بند کرے۔ واہم کوالخواہ تا باور تننگ آن گڈ کسر تِہ ملار، ولے ڈپٹی کمشنر نا دفتر نا پیشن آ دائسکان برانز برجاء ءِ۔
دلجان بلوچ نا ایڑ برانزی کیمپ ئٹی پریس کانفرنس نا وختا بین برانز نا پڑو کریسس و کوالخواہ و جہی سروک آتا سوغند پرغند نا دوبہ خلکسس۔ او پارے کہ “نن بھاز گِنار کرین۔ دا بین برانز ننا گڈیکو اومیت ءِ۔”
برانزیک دلجان بلوچ نا دمدستی آجوئی نا خواست کننگ ءُ و برانز کروکا تا زیہا ایف آئی آر تِہ ایسر کننگ نا ہم خواست کننگ ءُ۔ خاہوت نا پاننگ ءِ کہ “اگہ دا برانز نا وختا ننے نسخان رسینگا گُڑا دا نا ذمہ وار ضلعی انتظامیہ مرو۔”
ایلو کنڈ آن بندغی حق آتا تنظیم بلوچ وائس فار جسٹس دلجان بلوچ نا زوراکی نا بیگواہی نا بارث ئٹ چاہنداری تننگ و خاہوت تون اواری نا درشانی کننگ کن چاگڑدی حوالکاری میڈیا غا مہم نا پڑو کرینے ہرا 1 دسمبر آ ننکان 8 بجہ غان نن نیمہ اسکان ایکس (مسکوہی ٹوئٹر) آ مرو۔
