بلوچ یکجہتی کمیٹی نا رہشون پارے کہ بلوچستان آن اسلام آباد اسکان، ظلم ئنا مون پھاش مننگ ءِ۔
بلوچ سیاسی و بندغی حق آتا باسک و بلوچ یک یکجہتی کمیٹی نا آرگنائزر ماہ رنگ بلوچ ایکس آ تینا درشان ئسیٹی پارے کہ بلکہ داسا بلوچستان آن پیشن رہینگوک بندغ آتے ہم ریاست نا فاشسٹ و زوراک آ دروشم نا راستی سمجھ ئٹ برے۔
او پارے کہ اسلام آباد آن حوالکار مطیع اللہ جان نا زوراکی ئٹ بیگواہی، دروغ ئنا مقدمہ ٹی دزگیری و پی ٹی آئی نا برانزی تا ریاستی بیدادی ئے ریاست نا زوراکی نا پالیسی پارے۔
دا تدینی تا حوالہ ترسا پارے کہ اگہ ڈیہہ ئنا دارالحکومت ئٹی، ہراڑے ہزار آتا کچ ئٹ کیمرہ و میڈیا ارے، دُن انگا زیادتیک مریرہ گُڑا بلوچستان نا مُر انگا ہندآتیٹی، ہراڑے نہ میڈیا ارے نہ انٹرنیٹ، ریاست نا زوراکی و بربریت نا تصور ہم خوفناک ءِ۔
ماہ رنگ بلوچ پارے کہ بلوچستان ئٹی ریاستی ادارہ غاک بندغ آتِہ زوراکی ئٹ بیگواہ کیرہ، پدا اوفتِہ دروغ ئنا مونتس تیٹی شہید کرسا دہشت گرد پارہ یا دروغ ئنا مقدمہ تا رد ئٹ دزگیری تِہ پھاش کیرہ دا کُل ئنا مننگ آن پد ہم میڈیا و بندغی حق آتا ادارہ غاک بے توار تماشائی جوڑ ءُ۔
او پارے کہ اسلام آباد ئٹی پی ٹی آئی نا برانزی تا سُمکاری، خلنگ و ٹپی کننگ و کیہی بندغ آتا دزگیری نا مذمت و پارے دا تدینیک ریاستی زوراکی نا پاش ءُ پیدواری ءُ۔
او مُستی بلوچستون ئٹی برجاء انگا زوراکی تا پارے کہ گوادر ئٹی بشیر بلوچ ئے کیہی توو مُست زوراکی ئٹ بیگواہ کننگ آن پد دزگیری پاش کننگا و پدا اودے دروغ ئنا مونتس ئٹی خلنگ آن پد دہشت گرد پاننگا۔ ہندن تربت آن ڈاکٹر ظفر و اونا مار ئے کیہی بندغ آتِہ زوراکی ئٹ بیگواہ کننگا ہنوکا توُ ئٹی سد آن زیات بلوچ ورنا تِہ زوراکی ئٹ بیگواہ کننگا و کیہی تِہ خلنگا۔
بلوچ راہشون مُستی پارے کہ نن مُدام پارینن کہ دا ریاست نا زورای تیان کس ئس رکھکوک اف ہرافک اینو بے توار ءُ پھگہ ہندافتا اُراتِہ ریاست ہشو۔
ماہ رنگ بلوچ بندغی حق آتا تنظیم، میڈیا و سیاست دان تا بے تواری آ افسوس کرسا پارے کہ بلوچ اُلس آ زوراکی تا کس ئس توار بُڑز کننگ کن تیار اف۔
