کراچی ایئرپورٹ نا رکھ آ سلوک پولیس کارندہ و خوانندہ ئسے اونا اُراغان بیگواہ کننگانے۔
پاکستانی لشکر کراچی نا ہند گلشن اقبال آن اِرا بندغ دزگیر کننگ آن پد نا درستو جاگہ ئسے آ درے ہراکان پدا تومکا ورناک پھاش کننگ متنو۔
بیگواہی نا گواچی کننگوک بندغ آتیٹ ایس ایم لاء کالج کراچی نا خوانندہ حاتم بزنجو و ایئرپورٹ سیکیورٹی فورس نا اے ایس آئی دلوش بلوچ اوار ءُ۔
اوفتا خڑک ئنا حوالکار تا رد ئٹ تومکا بندغ آتِہ سادہ پچ بینوک کارندہ غاک کراچی گلشن اقبال ئٹ ساڑی اَسہ اُرا ئسے آن دزگیر کریر و بیدس وضاحت ان دریر۔ اوفتا خاہوت اوفتا زوراکی ئٹ بیگواہی نا بررخلاف توار بڑز کرسا انصاف نا خواست کرینو۔
خاہوت نا رد ئٹ او تدینی نا برخلاف ہندی پولیس ئے ایف آئی آر نوشت کننگ نا خواست کرینو ولے پولیس ایف آئی آر نوشت کننگ ان نمن مسنے۔
یاتی مرے کہ تدوکا منہ تو تیٹ بلوچستان و ایلو ہندی زورانسری بیگواہی تا تدینی تیٹ فریشانی نا حد اسکان ودی مسنے، دا زوت ئنا کچ و حساب نا رد ئٹ ہند سال اکتوبر نا تو ئٹ بلوچستان تون اوار جتاء ہند آ تیٹ 110 آن زیات بندغ زورانسری بیگواہی تا گواچی مسنو، ہندا تو نومبر ئٹی دائسکان 90 آن زیات بندغ نا زوراکی ئٹ بیگواہی تا رپورٹ مونا بسنے۔
