پاکستان نا بنجائی اسلام آباد نا ہندی سینئر حوالکار و یوٹیوبر مطیع اللہ جان ئے ریاستی ادارہ آک زوراکی ئٹ بیگواہ کریر۔
دا رد ئٹ مطیع اللہ جان نا مار تھانہ جی نائن ئٹی درخواست نوشتہ کرے۔اونا مار ئنا پاننگءِ اونا باوہ ئے یازدہ بجہ آ اسلام آباد نا پمز اسپتال نا پارکنگ آن برمتہ کریر۔ اودے دننگ نا وخت آ حوالکار ثاقب بشیر ہم ساڑی اسک ہرادے برمتہ کروک آک یلہ کریر۔ پدا سہب ئنا چار بجہ غا حوالکار ثاقب بشیر اونا بیگواہی نا بابت ئٹ حال تسک۔
حوالکار ثاقب بشیر پارے کہ چار شمبے نا شام یازدہ بجہ نا خُڑک پمز اسپتال آن پیش تمیسا پارکنگ ئٹی سلوک تینا اُلاخ نا پارہ غا ہننگ اسک منہ بندغ ہموڑے بس ہرافک ننا مون آ پُچ شاغار و زور ئٹ لاری ٹی شاغسہ دریر۔دہ منٹ نا سفر آن پد ننے اسہ کمرہ ئسے ٹی دریر ولے پُچ مون آ تفوک اسک۔ ہندا بندغ آک کنے پاریر کہ نیتون ننے جیڑہ اف ہندا سوب آن نن نے ہچ پاپرون۔
ثاقب بشیر مُستی پارے کہ برمتہ کروکا اوڑا بیدادی کتوس و اِرا گھنٹہ آن پد آئی نائن نا خُڑک اسہ ویرانو جاگہ ئسے آ یلہ ترسا نرار۔
ثاقب نا رد ئٹ اود و مطیع اللہ جان پی ٹی آئی نا برانز ئنا وخت برانزی تا خلنگ مننگ نا حوال تِہ پک کننگ کن پمز آ ہناسُر۔ ننے برمتہ کننگ آن پد ہندا سوج کریر کہ چاہ کنپیرے؟ یخ افک؟ واش روم آ ہنپیرے؟
او پارے کہ وختس اودے یلہ کننگ کن لاری نا پارہ غا دریر ہمو وخت او اسہ بندغ ئسے آن سوج کرے ٹائم اخس ءِ او پارے کہ دو و نیم بجہ ءِ۔
ثاقب بشیر نا پاننگ اسک کہ او دا تدینی نا برخلاف اسلام آباد ہائی کورٹ ئٹی پٹیشن نوشتہ کننگ ءِ و مطیع اللہ جان خاہوت ہم ہندا عدالت آ ہنو۔
کالخواہ تا پارہ غان دائسکان دا تدینی نا بابت ئٹ ہچو ردعمل ئس تننگ متنے۔
یاتی مرے کہ داکان مُست مطیع اللہ جان ئے جولائی 2020 آ ہم اغوا کننگاس پدا 12 گھنٹہ آن پد یلہ کرئسُر۔
