پنجگور ائیرپورٹ روڈ آ ٹہِفوک شہید نواب اکبر خان بگٹی نا بُت ئے اسہ وار ئس ولدا نا درست آ بندغ آک پرغِسہ بڑیر۔
دا بُت اندا زوت ئٹ جوڑ کننگاسس، داکان مہالو ہم پنجگور ئٹ نواب اکبر خان بگٹی چوک آ ٹہِفوک بُت ئے نا درست آ بندغ آک نسخان تسوسر، ہموتم نا درست آ بندغ آک ہُچ آ تخوک نواب اکبر بگٹی نا بُت ئے ماس آن کشِسہ دریر۔
نواب اکبر خان بگٹی نا بُت ہراڑے ٹہِفوک اس او علاقہ ئے پنجگور نا رکھوک علاقہ سرپند مننگک۔
شاری تا پاننگ ءِ کہ اوفک سہب ئنا ہراتم بش مسر تو خنار کہ نواب اکبر خان بگٹی نا بُت ہُچ ئتون اوار تمانے۔ واہم دا بارث ئٹ کالخواک دائسکان ہِچ پاتنو۔
نواب اکبر خان بگٹی پنیئو سیاست دان ئس اسک۔ اودے 2006 نا سال ئٹ تراتانی نا علاقہ ٹی اسہ آپریشن ئسے نا وختا پاکستانی لشکر شہید کرے۔
دا بُت نواب اکبر خان بگٹی نا ہمو تالان مروکا عکس آ جوڑوک اسک ہراٹی او ہُچ آ تولوک مش تیٹ سفر کننگ ءِ۔
