بی وائی سی تینا بیان ئسیٹی پارینے کہ شہزاد ولد نذیر پنجگور نا ہند پروم نا ہندی ئسے، اونا عمر چانڑدہ سال مسُنے، ہرادے 31 مئی 2025 آ پروم آن زوراکی ئٹ بیگواہ کننگانے۔ اسہ سال ئسیان زیات اونا خاہوت اونا کسر آ ہُروک مسنے، ولے ایسر ئٹ اوفتے ہندا حوال رسینگانے کہ شہزاد ئے ریاست نا بھلنی ٹی کاریم کروکا ڈیتھ اسکواڈ شہید کرینے۔
بی وائی سی نا رد ئٹ شہزاد بلوچ تنیا چانڑدہ سالی ءُ چُناس اسک، اونا خواننگ و پگہ کن خوش ءُ تُغ خننگ نا عُمر مسنے ولے اودے زوراکی ئٹ بیگواہ کننگانے۔ اسہ لمہ ئسیکن داکان بھلو دڑد انت مرو کہ او تینا چُنا نا کسر آ ہُروک مرے، ولے اونا چنا نا جون سر مرے۔ اسہ ایڑ ئس تینا ایلم نا پھگہ کن اخس مُراد اُست ئٹی تورینے و او دا دڑد ئے تینا تیبہ زند ئٹی اُست آن دننگ کپک۔ دا تنیا اسہ چُنا سینا بیرانی اف بلکن تیبہ خاہوت نا دڑد ءُ رنج ءِ۔
ترجمان نا رد ئٹ پاکستانی ریاست اونا ادارہ و ڈیتھ اسکواڈ آتا نیمہ آن چُنا و زالبول ءُ لس شاری تے نشانہ کننگ اسہ لڑ ئٹ برجاء ءِ۔ دُن انگا گامگیج آک آئین، قانود و بندغی رہبند آتا برخلاف ءُ، ایلو نیمہ غا ریاستی پالیسی تا تنقید کروکا پُر ایمن انگا سیاسی باسک آتا برخلاف کارروائی کننگ ءُ۔
بی وائی سی جہانی تنظیم و بندغی حق آتا ادارہ تیان خواست کیک کہ اوفک بلوچستان ئٹی بندغی حق آتا حالیت آ پام ایتِر، ذمہ وار تے سوج کیر و شاری تا رکھنگ کن یخینی ءُ گامگیج ہرفِر۔
