بلوچ نیشنل موومنٹ نا نیمہ غان جرمنی نا شار گوٹنگن ئٹی بلوچستان نا ہند سوراب ئٹی پاکستانی جیٹ آتا عام شاری تا بمباری و ریاستی زوراکی تا برخلاف ریلی ئس کشنگانے و برانز کننگ مسونے۔ برانز ئٹی زیمی مروکا خاہوت آتون اواری نا درشانی ئے کرینو و جہانی سطح ئٹ دا تدینی ئے شنگ کننگ، جوانو وڑ ئسیٹ پٹ و پول و ڈوہدار آتے سوج کننگ نا خواست کرینو۔
برانزیک یورپی یونین، اقوام متحدہ و جہانی مخلوق آن خواست کرینو کہ اوفک بلوچستان ئٹی لس بندغ آتا قتل و بندغی حق آتا برخلافی آ پام ہیتر و تینا بے تواری ئے پرغر و عام شاری تا رکھیفنگ و اوفتے اذیت آن کھشنگ کن تروندءُ گامگیج ہرفر۔
برانز ئٹی بی این ایم جرمنی چیپٹر نا صدر اصغر بلوچ ہیت کرسا پارینے کہ زورگیرہ پاکستان نا قوضہ کننگوک آ بلوچستان ئٹی مروکا زوراکیک ظالم و مظلوم نا نیام ئٹی نو آبادکاری ئے نشان ہیترہ۔ بلوچستان ئٹی اخس وخت آن بلوچ تینا آجوئی نا جہد کن زوراکی تے مون تننگءِ۔ جرمنی زون ئنا سیکریٹری جنرل لقمان بلوچ پارے کہ سوراب و خاران ئٹی مروکا بمباری ٹی پاکستانی فضائیہ چُنا، زالبول و کماش کیہی بندغ آتے شہید کرینے۔ بلوچستان ئٹی میڈیا غا پابندی نا سوب آن راستی مونی بفک۔
وشمہ بلوچ جہانی ادارہ و بندغی حق آتا تنظیم آتیان خواست کرینے کہ اوفک جہانی رہبند آتا رد ئٹ گامگیج ہرفر تاکہ مونا مروکا زوراکی تے توننگ کن عام بندغ آتا رکھیفنگ یخینی جوڑ کننگے۔
اکبر بلوچ پارے کہ بلوچ راج تینا بنیاتی حق و آجوئی کن جہد کننگءِ، ہرانا توننگ کن پاکستان بلوچ راج ئنا نسل کشی ئے کننگءِ۔
