شال بلوچ یکجہتی کمیٹی نا بنجائی جارکش تینا درشان ئٹی پارینے کہ گوادر ئٹ حالت آک خراب ءُ۔ ریاست ادارہ و گْوادر انتظامیہ نا کنڈ آن گپ و تران نا کوشست بے سوبری ءِ۔ ہرانا مسخت برانزی تے منتشر کننگ و زوراکی ئے گیشتر کننگ ءِ، ہراڑان پین دتر وہو۔
او پارے کہ او اسہ کنڈ آن گپ و تران نا دعوی کیرہ، و ایلو کنڈ آن بی وائی سی نا راہشون تے دڑکو ایترہ کہ نن پرایمن برانز آن دُو ہفن یا او تاغت نا زور آ تولوک برانز ءِ منتشر کرور۔ انتظامیہ و کوالخواک بی وائے سی نا راہشون و ایلو برانزی تے لائو فائر ئٹ کھسفنگ نا دڑکو تننگ ئٹی ءُ۔ بیرہ اینو اوفک چھار وار دڑکو تسّنو۔
او پارے کہ درو نوشکی ٹی ریاستی لشکر ایمنی ئٹ برانز کروکا تیا مون پہ مون سُم کاری کرسہ اسہ ورنا ئس خلک و بھاز آتے ٹھپی کرے۔ کراچی ٹی ریاست ایمنی ئٹ برانز کروکا تیا تاغت کارمرز کرسا اوفتے خَلک و گِھر کرسہ دزگیر کرے۔ دا کاریمک اوفتا منافقی آ مسخت آتے پاش کیرہ۔ گپ و تران نا پِن آ بی وائی سی نا باسک و راہشون تا برخلاف تینا زوراکی تے مُرغن کننگ خواہیرہ۔
جارکش پارے کہ مُچا ریاستی تاغت و پِن ئنا بلوچستان حکومت بلوچ زنک کشی ئے تیز کننگ کن تینا تیوہ تاغت ئے کارمرز کننگ ءُ۔ اوفتا گپ و تران نا چم، ہمر کہ او ہنوکا اسہ ہفتہ سے آن کننگ ئٹی ءُ۔
نن نُمے آن خْواست کینہ کہ دا دتری آ زوراکی ٹی تینا برانز ئے برجاء تخبو و اوٹی سوگوی ہتبو۔ جہد آن ویتہ او تینا کسر ئے ساف خنسہ ظلم و تادی کرور۔
