پاکستانی لشکر مشکے آن چار ورنا زوراکی ئٹ بیگواہ کرے۔
بلوچستان نا ضلع آواران نا ہند مشکے ٹی پاکستانی لشکر و ڈھکوک ادارہ آ تا کارندہ آک چار بندغ ئے دزگیر کننگ آن پد نا دُرست ءُ جاگہ ئسے درے ہراکان پد اوفتا بارث ئٹ ہچ وڑ ئنا خبر ملنگ کتو۔
ہندی حوالکار آ تا رد ئٹ ہنوکا شام چار بجہ آن خُڑک پاکستانی لشکر مشکے نا ہند نوکجو ٹی بھلو کچ ئسیٹی ناکہ بند کرِسہ ہند ئے گھیرہ ٹی ہلک و ہمو وخت اُرا تیٹ چھاپہ ہم خلنگا۔
زوراکی ئٹ بیگوا مروکا بندغ آ تا پجار شہداد ولد اللہ بخش، عتیق ولد ماسٹر الہی بخش، منیر ولد نبی بخش و جبل ولد مجید نا پِن ئٹ مسُنے۔
حوالکار آک دا حوالہ ئٹ ہچ پاتنو۔
یاتی مرے کہ مشکے زوراکی ئٹ بیگواہی تیان زیات زیمی مروکا ہند آ تیان ءِ، داٹی بھلو کچ ئسیٹ بندغ آ تے ٹارگٹ کلنگ نا گواچی ہم کننگانے۔ دا ٹارگٹ کلنگ آ تا دوبہ پاکستانی لشکر نا بھلُنی ٹی چلنگوکا سلاہ بند ٹولیک ڈیتھ اسکواڈز آ خلنگانے۔
ہنوکا دے انکشاف مس کہ مشکے ٹی بندغ آ تے پاکستانی لشکر جبری مشقت تون اوار زوراکی ئٹ تینتو اوار دیک تانکہ آجوئی خواہوک آ تا جلہو آ تیان بچنگ کین، ہندی تے لشکری کیمپ آ تیٹ توار کننگ و حاضری خلنگ نا ہم پابند کننگانے۔
وائرل مروکو اَسہ ویڈیو سیٹی خننگ مریک کہ ڈیتھ اسکواڈز آ تا کارندہ آتے بے دادی نا گواچ کننگ ءُ۔ ہندی تا رد ئٹ ہندا بندغ آک زور ئٹ کاریم ہلِسہ پاکستانی لشکر نا کسر ٹی بروکا ڈھنگر تے صفا کننگ نا کاریم کننگ اسُر۔
