تربت نا علاقہ ناصر آباد ئٹی پاکستانی فوج ئنا نیمہ غان سختی، اُراتا ڈرون آتا نگرانی و شام ئنا تینا مون سُمکاری آن اُلس ذہنی پریشانی و سخت مشکل آتے مون تننگءُ۔
ہندی بندغ آتا پاننگءِ پاکستانی فوج بیدس سوب آن بندغ آتا دکان تے بند کیک، بندغ آتے تنگ کیک و اوفتے دزگیر کرسا اذیت تننگک۔ایف سی تینا چوکی تا کیمرہ خلکُنے و ہر وخت ڈرون کیمرہ تیٹ اُرا و آبادی تا نگرانی کیک۔
بندغ آتا پاننگءِ کہ گرمی نا سوب آن دا موسم ئٹی بندغ آک پیشن خاچرہ ولے تیبا شام ڈرون کیمرہ تا نگرانی نا سوب آن اُلس ئنا پریشانی تیٹی گیشی بسونے۔ داکان بیدس شام ئنا وخت فوج سُمکاری کیک ہرانا سوب آن بندغ آتا تُغ خرابءِ۔
ہندی بندغ آتا پاننگءِ کہ پاکستانی فوج تینا چوکی تے آبادی آن پیشن کشے۔ آبادی نا نیام کٹی فوجی چوکی تا اڈ کننگ، شام جنا فوج جنا ہن و بر و ہر وخت سُمکاری آن بندغ آک سخت ذہنی پریشانی و خوف ئنا گواچیءُ۔
ناصر آباد نا ہندی بندغ آک خواست کرینو کہ ایف سی نا نیمہ غان مروکا سختیک، اُراتا ڈرون کیمرہ تیٹ نگرانی و شام ئنا وخت سُمکاری زوت بند کننگ مرے تاکہ اُلسءِ رکھ و سکون تون زند گداریفنگ نا حق رسینگے۔
