بلوچستان نا ساحلی شار گوادر نا علاقہ جیونی ٹی پاکستانی لشکر مُسہ دے مُست ہندی بندغ آتا برخلاف لشکر کشی کرینے ءُ دا لشکر کشی داسکان برجاء ءِ۔
حوال تا رد ئٹ پاکستانی لشکر اینو پیشیم تو جیونی نا ہند پانوان ئٹی زوراکی کرسہ بیگواہ کننگوک علی اصغر نا اُرا ئے بُھس کرینے۔
یاتی مرے کہ علی اصغر ئے پاکستانی لشکر 16 اپریل 2026 آ دزگیر کننگ آن گُڈ زوراکی ئٹ بیگوہ کریسس ، داسکان اونا ہچو حوال ئس اف۔
ہندی بندغ آتا رد ئٹ گدرینگوکا منہ دے ئٹی پاکستانی لشکر پانوان ءُ ایلو خُڑک ئنا ہند آتیان بھلو کچ ئسے ئٹ بندغ آتے دزگیر کننگ آن گُڈ زوراکی ئٹ بیگواہ کرینے۔
