بلوچستان نا محکمہ داخلہ سوراب ، خضدار و وڈھ ئنا ضلع تیٹی N-25 بھلا کسر آ برانز و کسرتے تفنگ نا سوب آن دفعہ 144 خلکُنے۔
محکمہ نا رد ئٹ N-25 کسر آ برانز، دھرنا، جلوس، کسر ءِ تفنگ و ٹریفک نا روانی ءِ توننگ نا گامگیج آتا پابندی ءِ ۔ دا کسر ضلع و صوبہ تا بھلا کسر ءِ ، ہرانا بند مننگ نا سوب آن مسافر، ناجوڑ ، کاروبار، ٹرانسپورٹر و لس شاری تے جنجال آتیتون مون تروئی تمک۔
حکومت ڈی سی و پولیس ءِ پارینے کہ دا حکم نامہ ءِ عمل ئٹی ہتیسا کسر تا ٹریفک نا روانی ءِ برجاء تخنگ مرے۔دا حکم نامہ مُسہ تُو اسکان نافذ مرو، واہم کالخواک تینا منشاء ئٹ دادے بدل یا ایسر کننگ کیرہ۔
یات مرے کہ سوراب ئٹی پاکستانی لشکر مسجد و عام آبادی تا بمباری کریسس ہرانا سوب آن برانز کننگاسس و اینو ہم سوراب نا ٹک آ ہندی کاروباری بندغ آک استو دکان تا دُزی نا برخلاف کسر آ برانز کننگءُ و ٹریفک بند ء۔
