مستونگ ہنوکا شام بدنام زمانہ کاؤنٹر ٹیررزم ڈیپارٹمنٹ سی ٹی ڈی نا دُو آن اُرا ٹی چھاپہ نا وخت زوراکی ئٹ بیگواہ مروکا امیر حمزہ بنگلزئی نا زوراکی ئٹ بیگواہی نا برخلاف خاوت برانز کرسا جنگل کراس نا ہند آ کسرے بند کرے ۔
برانزی تا پاننگ ءِ کہ ہنوکا شام یک بجہ آن خُڑک سی ٹی ڈی کارندہ آک دیوال لگیسہ بسُر ، زالبول وچُناتے امیر حمزہ تون اوار اُرا آن کشسہ تشدد کریر موبائل آ تے پھلار پدا امیر حمزہ ئے ارفیر لاری ٹی دریر ، اراکان پد اونا ہچو حوال ئس اف ۔ خاوت نا خواست ئے کہ امیر حمزہ ئے آجو کیر ۔
ایلو نیمہ آ ہنوکا بیست سال آن 12 سالی نعمت اللہ پنی آ چُنا نا لمہ برانز ئٹی پارے کہ اونا مار بائی پاس مشین آن بیگواہ کننگا بیست سال نا وخت گدرینگانے ، نن ایف آئی آر ہم نوشتہ کرفین اُن ولے او دائسکان بیگواہ ءِ ۔
نعمت اللہ نا لمہ نا پاننگ ءِ کہ اونا مار 12 سال ئناس ئس اراوخت او بیگواہ کننگاسس ، نن ہر جاگہ پٹنگ ناکوشست کرین ولے اونا ہچو حوال ئس اف کہ او ارانگءِ ۔
