کوئٹہ و کراچی آن پنچ بندغ آتے زوراکی ئٹ بیگواہ کننگانے، ہرافتیٹی اسہ 17 سالی ءُ خوانندہ ئس تُد ءِ و اسہ بندغ ئس اِرا سال آن بیگواہ ءِ۔
حوال تا رد ئٹ کوئٹہ نا علاقہ کلی الماس ایئرپورٹ کسر آن 17 سالی آ خوانندہ اسفند بلوچ ولد دوست محمد ئے 04 اگست 2026 نا سوب ئنا چار بجہ غا پاکستانی فوج ئنا ڈھکوک ادارہ آئی ایس آئی، سی ٹی ڈی و ایم آئی نا کارندہ آک دزگیر کننگ آن پد بیگواہ کرینو۔
کوئٹہ نا ہندی واجد بلوچ ولد محمد انور ئے ہم زوراکی ئٹ بیگواہ کننگانے۔ 27 سالی آ خوانندہ واجد بلوچ ئے 10 اگست 2024 نا شام یک بجہ نا خُڑک قمبرانی کسر، کشمیر آن سی ٹی ڈی نا کارندہ آک زوراکی ئٹ بیگواہ کرینو، اِرا سال آن پد ہم اونا بابت ئٹ ہچو حوال ئس اف۔
ایلو نیمہ غا کراچی نا علاقہ حاجی شاہ علی ٹاؤن، شرافی ملیر آن اِرا بندغ، 26 سالی آ مزور اسامہ ولد صادق و 25 سالی آ مزور نیاز ولد رشید ئے 01 اگست 2026 نا شام 1:30 بجہ نا خُڑک رینجرز و سی ٹی ڈی نا کارندہ آک دزگیر کرسا بیگواہ کریر۔
حاجی شاہ ٹاون نا پین بندغ ئس ہرا مستری ئسے و شنبے گوٹھ، شرافی ملیر کراچی نا ہندی ئسے، شاہد ولد عبدالحمید ئے ہم 01 اگست 2026 ئنا شام ئنا 1:30 بجہ غا رینجرز و سی ٹی ڈی نا کارندہ آک دزگیر کرسا زوراکی ئٹ بیگواہ کرینو۔
