بی وائی سی نا رہشون و زوراکی ئٹ بیگواہ کننگوک آ ڈاکٹر دین محمد نا مسڑ سمی دین سوشل میڈیا ٹی شنگ کروک تینا اسہ درشان ئسیٹی پارینے کہ ہرا سرکاری نمائندہ آک میڈیا ٹی توسنو اوفک پارہ کہ زوراکی ئٹ بیگواہ کننگوک آ بندغ آک راستی ئٹ بیگواہ ءُ گُڑا اوفتا خاہوت آک پولیس نا رہا ایف آئی آر کیر یا زوراکی ئٹ کننگوک آ بندغ آتا کمیشن آ کار۔ ہمو میڈیا ٹی تولوک آ نمائندہ آک اول فوزیہ و پدا ننا وڑ ءُ سد آتا کچ ئٹ زیمی مروکا خاہوت آتا راستی ئے پہہ مریر کہ ننے اَرا وڑ اسہ ایف آئی آر ئس نوشتہ کننگ کن تو تا تو اسہ دڑدی ءُ جہد ئس کننگ خواہک۔
سمی دین پارے کہ خاہوت آک اسہ لڑ ئٹ تھانہ آتا کارہ، در آتے خلیرہ، خواست کیرہ، بلے دا کُل آن پد اسہ ایف آئی آر ئس نوشتہ مفک۔
سمی دین درشان ئٹی پارے کہ وختس بنیاتی قانودی حق آک پُلنگ مریر، پدا ہندا پاننگ مرے کہ پولیس نا رہا ایف آئی آر نوشتہ کبو یا کمیشن آ کیس ئے دبو گُڑا دا زمینی راستی تا وے چاننگ ءِ بلکن زیمی مروکا خاہوت آتے اذیت تننگ نا چم ئسے۔
