مُسہ جہانی بندغی حق آتا تنظیم آک ہیومن رائٹس فاونڈیشن، فریڈم ہاوس و ہندوز فار ہیومن رائٹس نا ادارہ آک بلوچ راج ئنا پنی آ بندغی حق آتا باسک و بی وائی سی نا سربر ڈاکٹر ماہ رنگ نا آجوئی کن تینا خواست آتے اقوام متحدہ ٹی یاداشت کریر۔
اوفتا پاننگ ءِ کہ ڈاکٹر ماہ رنگ بلوچ نا دزگیری جہانی قانود آتا لتاڑنگ ءِ، ہندا سوب آن اودے زوت آجو کننگ مرے۔
تنظیم آتا درشان ئٹی پاننگانے کہ ڈاکٹر ماہ رنگ بلوچ بی وائی سی نا سربر ءِ و بلوچستان ئٹی زوراکی ئٹ بیگوائی و غیر قانودی کوش آتا برخلاف پُر ایمنی ئٹ جہد ئٹی مسنے۔
درشان ئٹی پاننگانے کہ ماہ رنگ نا بندغی حق آتیکن کاریم تے جہانی پِڑ آ سِفت کننگانے، اونا پن 2024 ئٹی ٹائم نیکسٹ و بی بی سی نا سد پنی آ زالبول آتا لڑ ئٹ اوار کننگانے۔ اودے 22 مارچ 2025 آ اسہ برانز ئسیان دزگیر کننگاسس پدا تھری ایم پی او نا ایکٹ ئنا رد ئٹ ماہ رنگ آ کیس کننگاسس۔
تنظیم آتا پاننگ ءِ کہ کیس آتا کارروائی تا نیام ئٹ ڈاکٹر ماہ رنگ ئے قانود نا رد ئٹ انصاف تننگ متنے، وکیل آتے ہم النگ متنے، سوال و جواب آک زندان ئٹی بند ءُ کوٹھی سیٹی مسنو۔ 22 جون 2026 آ اودے قتل ئنا دوبہ ئٹ دوارہ عمر قیذ ئنا سزا تننگانے۔
