بلوچ نیشنل موومنٹ نا چیئرمین ڈاکٹر نسیم بلوچ نا بھلنی ٹی بیلجیم نا بنجائی شار برسلز نا یورپی یونین پارلیمنٹ آ ہنار ، ہراڑے اوفک یورپی یونین پارلیمنٹ نا کیہی باسک آتیتون اوار توسُر ۔ ہندا تولنگ نا نیام ئٹ یورپی یونین نا جنرل لائزڈ اسکیم آف پریفرنسز پلس ( جی ایس پی پلس ) نا رِد ئٹ پاکستان نا ذمہ واری ءُ ہرافتا کاریم تا بابت ئٹ گپ ءُ تران کننگا۔
بی این ایم نا راہشون آک بلوچستان ئٹی بندغی حق آتا نگیگ آ جاور آتا زی آ فریشانی نا درشانی ئے کریر و زوراکی ئٹ بیگواہی ، وے قانودی ئٹ کھسفنگ ، تینا سر آن بیگواہی، مُچی سزا ءُ بنیاتی آجوئی نا پابندی ئے مونا ہترنگے ۔ اوفک پاریر کہ انسانی حق آتا لتاڑنگ نا برخلاف جہانی بندغی حق آتا قول آتا لتاڑینگ ءِ ، دافتا توننگ کن پاکستان ئے جی ایس پی پلس نا بند کننگ نا بنیاتی شڑط ءِ۔
اوفک یورپی یونین آ زور شاغار کہ او پاکستان ئے جی ایس پی پلس نا بارو ئٹ ذمہ واری تا زی آ دلگوش کیر ، دلجمی ئٹ پٹ ءَ پول کیر ، و بلوچستان ئٹی برجاء بندغی حق آتا لتاڑ آتا زی آ پاکستان نا جی ایس پی پلس ئے ایسر کیر ۔
دا وخت آ یورپی یونین پارلیمنٹ نا کارکن برٹ یان روئسن ، پاؤلو بورکیا، ماتے ٹونن و اوزلیم دیمیرل تون ہیت کریر ۔ دافتان بیدس کارکن آک جوبلی کمپین نا ایگزیکٹو ڈائریکٹر این بووالڈا او کمیونیکیشنز ایسوسی ایٹ ھلدا پھمی تون توسُر۔
ہندا تولنگ نا نیام ئٹی اوفک بلوچستان نا بندغی حق آتا لتاڑ نا جاور آتا زی آ اسہ مکمل ءُ رپورٹ ئس تِسُر ہرانا تہٹی زوراکی ئٹ بیگواہی ، وے عدالت آن کوش ءُ بلوچ یکجہتی کمیٹی نا راہشون ڈاکٹر ماہ رنگ بلوچ ءُ صبغت اللہ شاہ جی نا عمر قید سزا نا زی آ تران ہم اوار اسک ۔ اوفک یورپی ادارہ تیان خواست کریر کہ او سوج کننگ ئے دلجمی ئٹ ایتر ءُ جی ایس پی پلس نا جوڑ کروک بندغی حق آتا راہ بند آتا پہریز کننگ کہ دلجمی ئٹ گامگیج ہرفنگ مرے ۔
جھگیر آتون بی این ایم نا بندغی حق آتا ادارہ پانک ئنا رسانکدری حوالکار جمال بلوچ، پارٹی نا رسانکدری ، آئی ٹی ءُ دودمانی ادارہ نا باسک ظہیر بلوچ ،صفیہ بلوچ اوار اسُر۔
