نوشتہ کار: خلیل بلوچ
مٹ و بدل: راسکوہ بلوچ
ارٹمیکو بشخ
شہید جانان شیراک اسہ سوب ئس ننا اُرا غا بس حال ئس تِس کہ ریاست بی ایس او خاران ہنکین نا اِرا سنگت اِستو بیگواہ کرینے، داسہ ننا جند ئنا ہند و دیار ئٹ تولنگ تینے نسخان تِننگ نا بریبر ءِ۔ شیراک ہمو وخت آ بے پِن ءُ دیار ئسے کن پیشتما، ای ہندا جان بڈ و ہر کاریم ئٹ ہُرے کروک۔ گڑا ای انگہ اسہ دے ئس ہند ئٹ تینے توریٹ، پدا ای ہُراٹ کہ کنکن ہم وڑ آک ناگیگ ءُ، ہند و علاقہ ٹی دُن ءُ جاگہ ئس دو بتو کہ تینے اسہ و اِرا دے تورِو۔ دا بابت ئٹ بارگ جان تون حال حوال مس گڑا او سمیر پنی ءُ سنگت ئسینا نمبر ئے مون تِس و پارے "ہندانا رئی آ کاس”
ای حال حوال کریٹ ہُراٹ توار تہ چائوک ءُ بندغ ئسینا ءِ، ای کہ رئی آتہ ہِناٹ ہراٹ دا ہمو بندغ ءِ۔
پین اسہ سنگت ئس تد ءِ تہ، او کنا دوتے دروت ہلک، تِپرہ کنے بھلو سرمچار ئس سمجھا امر، ولے او ہمو وڑ ئٹ لاغر و نزور اَس۔ گڑا ای کسر ئٹ ہِننگ نا وخت آ سوج کریٹ سنگت نے اُراٹی اِرغ تفسہ امر، نی دا وڑ لاغر اُس؟ ورندی تتو تنیا بشخندہ کرے۔ ای اُست ئٹ پاریٹ سخت کبین ءُ بندغ ئس ءِ، دا مدام ہندا وڑ ئٹ اَس۔ پوسکن آ بندغ تا مون ئٹ بے توار اَس، اسہ دے ئسے آن پد ہندا وڑ کچاری و دیوان اَس پاروس سال آتیان سنگت ءِ۔
اسہ دے ئس ای ہموڑے مسُٹ و پدا پیشتمان۔ ہندا نیام ئٹ یک و نیم سال اسکان وتاخ آن پیشتمتوٹک، موبائل ہم الو کنے کہ نیٹورک ئس ہلیو و حال حوال ئس کیو۔ ہندا دے تیٹی ڈاکٹر منان ہم ننا ہند آ بسَس، گڑا ای و سنگت ئس ہند ئنا نیمہ غا بسن۔ دا وخت آ ڈاکٹر منان میرل و بارگ جان نا ذمہ ئٹ اَس، گڑا ای سنگت ئے پاریٹ اول کنے ڈاکٹر منان نا دیدن آ در پدا نے موکل ءِ ای تینا کاریم تے تینٹ ٹہیفوہ۔ گڑا ہُرِنہ ہر نیمہ ئٹ کہ ڈاکٹر سیاسی کاریم تا خاطر آن کائک ہندا بندغ ہمراہ ئے تہ۔ ہندا وخت نن سخت خڑک مسُّن، ہراتم ای ہند ئٹ بروسٹ گڑا او ساڑی اَس۔ وار ئس اسہ کاریم ئٹ- دم درینگ ئے ہچ تِتوکہ- نہ کہ دون ءُ اُزر و بہانہ، شام نا ہرا پاس مَروس یا دے ئنا ہرا ساعت ہندنکہ کلہو ئس تِروسس او ساڑی اَس۔
اسہ رند ئس ای سوج کریٹ نا موبائل چارج کنپک کہ نی بیست و چار ساعت لین ئٹ اُس؟ گڑا تینا موٹر سائیکل نا بیٹری ئے نشان تِس کہ (EVO) ہموڑے خلوک اَس و پارے: "ای دا وڑ ءُ جگاڑ ئس جوڑ کرینٹ تانکہ ہر وخت لین آ مریو کہ اچانک سنگت آک لین آ بریر ای لین آ مریو”۔
ای شار ئٹ بھاز سنگت خنانٹ، بلکن ای تینٹ ہم شار ئٹ مسُّن اُٹ کہ ذاتی زندگی نا آختئیک سخت بھاز مریرہ، ولے دادے نی پاروس ذاتی زندگی الو۔ اگہ یونیورسٹی ئٹ اَس ہندا گل (تنظیم) نا کاریم آتیٹی کاٹم تفوک اَس۔ ہند آ بروسس شام و دے ئے تتوکہ، بلکن بیست و چار ساعت راجی کاریم تیٹی آختہ اس۔
اسہ رند ئس ای و میرل ہند آ اِناسن، گڑا میرل اوڑا سخت چِڑاسک، ای سوج کریٹ انت ئس مسنے؟ پارے: "دا مدام جگاڑ تینے گدریفک، دادے پین سنگت ئس تد مسنے ایف سی نا کارندہ ئس خنانو دا پارینے بر خیِر آن ٹکر ئس خلینتہ توفک ئے تہ ہرفن۔ داسہ نی پار فلم ئس چلینگ ءِ کہ دو خالی ئٹ دا ایف سی کارندہ ئے خلیرہ و توفک ئے ہرفرہ.”
ای و میرل سخت ٹہک تِسن و مخان، پدا میرل کنے مون تِس کہ ” در دادے خوائف و تینا وڑ سرپند کرتہ کہ آخر او انتئے دا وڑ کیک۔”
برجاء۔۔۔
