نوشتہ کروک: اِستار بلوچ
اگہ نن جہانی تاریخ آ نظر شاغن تو دا راست آ ہیت پھاش ءِ کہ قوضہ کروک وخت ئس اَسہ ڈغار ئسے آ زغم و توفک تون زور ئٹ جُلہو کرینے قوضہ کرینے، گْڑا او قوم ئنا قدرتی مڈی تیتون اوار اوار اونا تاریخ، زبان ،ادب توڷ ءَ بش نا وڑ، رسم و دود آتے ہم پھلانے و تینا وڑ ئنا بدلی ہیسُنے و دا محکوم آ قوم ئنا رہینگوکا گُلزمین نا خواجہ آتے ذہنی وڑ ئٹ تینا غلام جوڑ کرینے۔ ولے محکوم آ قوم ئنا انقلابیک تینا وطن نا آجوئی ئے دوئی کننگ کِن جہد کرسہ و قربانی تِرِسہ مونی بسّنو، اوفتا خن تیٹی خن خلکُنو پد سلتنو۔
دا ہیت ہم تاریخ ئٹی ڈھکوک اف پھاش ءِ کہ قوضہ کروک تون مدام طاقت، وسائل، توفک پوسکن ءُ جنگی ٹیکنالوجی زیات اَرے ، ولے محکوم تینا کم مڈّی تون قوضہ کروک نا مونا سلیسہ گوریلہ جنگ ئنا حکمت عملی ئٹ اوڑتو جنگ کرینے و تینا ڈغار نا خواجہی ئے منّیفسہ آجوئی دوئی کرینے۔
اینو بلوچ قوم ہم دنیا نا ایلو محکوم آ قوم آتان بار ءِ، ہرافتا وطن ئے زور ئٹ پھلنگانے، تینا ڈغار نا آجوئی کن قوضہ کروک پاکستان تون تینا قوم ئنا آسودئی و ڈغار خواجہی کِن آجوئی نا جنگ ئٹی ءِ۔
دا انقلابی آ گوریلہ جنگ ئٹی بھاز آ ورناک، پیر و کماش آک، نیاڑی و نرینہ غاک وطن نا خواجہی کن اوار سلِیسہ تینا ساہ تے گوری کرینو و بھاز بھلو کچ ئسیٹی وطن تو مہر ئنا سوَب آن کیہی سال آتان زندان نا تہار آ کوٹھی تیٹی جبر سَہنگ ئٹی ءُ۔ سیاسی بندی کننگانو و ہندن ہزار آ ورناک جنگی حالیت ئٹی سرمچاری آ زند ئٹی ءُ۔
دا اسہ فطری ءُ عمل ئس ءِ ہر بندغ ئے تینا ڈغار تون مہر و مابت ارے، ولے قوضہ کروک نا رد عمل ٹی محکوم نا مہر و مابت تینا گُلزمین تون پین گیشتِر مسنے، کم متنے، ہندن نزیر جان ہم گُلزمین تون مہر کروکو اسہ سنگت ئس اس ہرانا عمل قوضہ کروک آ ریاست کِن اسہ جوانو عمل ئس الو، تاریخ دا گِڑا ئے ہم پھاش کرینے کہ محکوم نا ہر انقلابی آ عمل قوضہ کروک کِن دہشت گردی ئس ءِ و محکوم کِن دا عمل اَسہ انقلابی او گام ئسے نا رنگ مسنے۔
سنگت نزیر جان وڈھ ئنا رہینگوکو ورناس اس ہمو وڈھ کہ ہراڑے شہید نورا مینگل، گوہرام مینگل، شہید علی محمد و شہید عمران لانگو و ایلو شہید آک جہی مسّنُو ہندن وڈھ ئنا سرزمین نا باتیک لمہ وطن تون مہر کرِسہ قوضہ کروک نا جوڑوک ڈیتھ اسکواڈ نا سُم تا ہم گواچی مسّنو، لاش ہرفینو بے گوا مسّنو۔
شہید سنگت نزیر نا گناہ دا اَس کہ او عوامی سیاسی مُچی ئسیٹی تینا وطن نا بیرک ءِ بڑزا کرے و تینا وطن تون مہر و مابت نا درشانی ئے کرے۔ دا عمل قوضہ کروک آ ریاست کِن بھلو خُلیس ئس جوڑ مس گُڑا او سنگت نزیر جان نا رند ئٹ تما اودے بیگوا کننگ کِن اوڑا چھاپہ خلک دے ئس نزیر جان اونا دوٹی بتو گُڑا اودے ذہنی وڑئٹ پریشان کننگ ئے بناء کرے، سنگت نزیر جان ئے کسر مِلتو کہ او تینا مابت نا درشانی ئے اسہ گوریلہ جنگی سپاہی ئسینا نا وڑ ئٹ کے، وطن نا مہر آ آخریکو کوک اِسکان سلِہ، ہڑدے نا چھاپہ ،ذہنی فریشانی اودے کمزور کریسس، پدا ہم او داخس نزور الو کہ قوضہ کروک نا مون آ کاٹم ئے شیف کے۔ او ہندا سوب آن دشمن نا دو ٹی تمنگ آن تینا ساہ ئے تینٹ ہلنگ ئے جوان سرپند مس و دے ئس تینا سم ئے ایلو گُڈیکو سُم ئنا شہید آتان بار تینا کاٹم ئٹ خلک و تینا گُلزمین تون مہر و مابت ئے عملی وڑ ئٹ نشان ترسہ دشمن ئے شکی کرے۔
شہید اخلاق جان شہید سنگت نزیر نا بھاز خُڑکو سنگتس اَس دا تدینی آن شہید سنگت اخلاق جان قوضہ کروک نا ظلم و تادی ئے پین خوڑتی ئٹ خنا و چائس کہ قوضہ کروک تون ہیت و تران مننگ کپک بلکن اودے مِڑوئی تمِک، خلوئی تمِک و تینا ڈیھ آن کشوئی تمِک ہندا چائنداری و گُلزمین نا مہر اودے وڈھ آن بولان، مستونگ، قلات مہلبی آ درے و اِخلاق آن نزیر اِسکان سر کرے۔
