بلوچستان لبریشن فرنٹ نا ترجمان میجر گہرام بلوچ میڈیا ٹی شنگ مروکو بیان ئسیٹی پارے کہ سرمچار آک اسہ کاروائی سیٹی 12 جون 2026 آ نوشکی نا ہند مل ئٹی فرنٹیئر کور (ایف سی) نا لاری ئسے آئی ای ڈی (IED) بم جلہو ئٹ ٹک کریر ہرانا سوب آن اِرا کارندہ کھسکر و بھاز آک ٹپی مسُّر۔
ترجمان پارے کہ 10 جون 2026 آ بی ایل ایف نا سرمچار آک اسہ جلہو ئسیٹی پنجگور نا ہند سری کوران نا ہندی و ڈیتھ اسکواڈ نا بھلا حاتم ولد پیرجان و حلیم ولد محمد اعظم ئے کھسفیر و اوفتا اسہ سنگت ئس مہروز بھاز ٹپی مس۔ بی ایل ایف نا سرمچار آک ڈیتھ اسکواڈ نا کارندہ غاتے ہمو وخت ٹک کریر ہرا وخت او بازار نا کسر ئٹ ایف سی کیمپ ئنا نیمہ غا ہِننگ ئٹی اَسُر۔ دا مسٹ انگاک بریگیڈیئر ظفر اقبال نا بھاز خڑک ءُ کارندہ اسُر۔
حاتم تدوکا وخت ئٹی لشکرِ بلوچستان نا باسک ئس اسک۔
توفک بِٹنگ آن پد او نو سال اِسکان مشکے ٹی فوج ئنا آلہ کار مہر اللہ محمد حسنی نا شیف قوضہ کروک آ فوج ئنا خاطر کاریم کریسک۔ پدا او ڈیتھ اسکواڈ نا ایلو باسک آتون آوار مرسہ اسہ پوسکن ءُ ٹولی ئسینا بھلُنی نا ذمہ وار مس۔
کمانڈنٹ پنجگور، بریگیڈیئر ظفر اقبال ہمو ٹولی نا نگہوان ءِ۔ ہمونا پاننگ ئٹ سوردو، سری کوران، وشاب و وشبود نا ہند آتیٹی جنز آجوئی و بلوچ الس ئنا بر خلاف کاریم نا ذمہ واری حاتم نا ذمہ ٹی اَس۔ ہموڑے او تینا ٹولی تون اوار کاریم کریکہ۔ بلوچ ورنا و زالبول آتا بر خلاف بھاز آ کاروائی تیٹی حاتم مون پہ مون اوار اس۔
پنجگور، سگار، سوراپ، وشبود، پاردان و نِوان نا ہند آتیٹی بلوچ سرمچار آتا کسر تفنگ، فوجی آپریشن تیٹی دشمن کن سہولت کاری، سرمچار آتا سیال آتا اُرا تیا چھاپہ خلننگ، دستی بم جلہو، کھسفنگ و زوراکی ئٹ بیگواہ تیٹی حاتم نا اہم او کڑد ئس اس۔ داڑان بیدس، او جنز تون تفوکا باسک آتا خاہوت آتے و زالبول آتے زور ئٹ پریس کانفرنس و وے تعلقی نا پاڑو آتے کرفننگ نا وڑ ءُ کاریم تیٹی ہم اوار اس۔ بریگیڈیئر ظفر اقبال حاتم ئے بھاز آ کاروائی تیکن بھلو کچ ئسیٹی سلاہ، لاری و خاص آسراتی ہم تس ئس۔
خلننگوک آ ایلو کارندہ، حلیم ولد محمد اعظم ہند سری کوران 2017 آن ملٹری انٹلیجنس (MI) کن کاریم کننگ اس، لس مخلوق ئے کھسفنگ، زوراکی ئٹ بیگواہی، کسر تفنگ، ٹارگٹ کلننگ، دزی، بلوچ زالبول آتے بلیک میل کننگ و زوراکی ئٹ پریس کانفرنس کرفنگ تون اوار بھاز ڈوھ تیٹی اوار اسک۔ او حاتم نا خڑک ئنا سنگت ئس اَس۔ ولے دا ہڑتوماک جتا جتا ٹولی تا بھلنی ئے کریرہ۔
تسپ نا ہندی مہروز ہم دافتا خڑک ئنا سنگت ئس اس، جلہو نا وخت ہمو لاری ٹی سوار مننگ نا سوب آن ٹپی مس۔
ترجمان مُستی پارے کہ 09 جون 2026 آ سرمچار آک نوشکی نا ہند کُچکی نا ہند آ ناکہ بندی کننگ تون اوار مچ لاری تا تلاشی ئے ہلکر۔ دا وخت سرمچار آک کچکی پولیس چوکی آ قوضہ کرسہ تیبہ سرکاری ریکارڈ آتون اوار چوکی ئے ہم خاخر تسُر۔ دا ناکہ بندی اِرا ساعت اسکان برجاء مس۔ ہرانا مسخت ہند ئٹی تینا کنٹرول ئے برقرار تخنگ و فوج و اونا آسراتی تروکا تا سر پُر ئے غیر محفوظ کرسہ کم کننگ ءِ۔
ترجمان بیان نا ایسر ئٹ پارے کہ 07 جون 2026 آ سرمچار آک گوادر نا ہند گبد قلاتو ئٹی دوبیست پنجاہ روڈ ئٹ بھاز آ جاگہ غاتیا ناکہ بندی کرسہ علاقہ نا کنٹرول ئے دوئی کریر۔ دا کاروائی نا وخت آ سرمچار آک خڑک پولیس ئنا اِرا چیک پوسٹ آتیا قوضہ کرسہ اوڑے ساڑی سرکاری سلاہ و ایلو لشکری ازباب آتے دوئی کریر، ہرافتیی اسہ ایم۔16 رائفل، مسہ کلاشنکوف رائفل بمعہ میگزین، اسہ لاری ئس و ایلو فوجی ازباب آک آوار ءُ۔ داڑان بیدس، سرمچار آک چیک پوسٹ ئٹ خلوکا فوجی جاسوسی نا کیمرہ غاتے ہم تباہ کریر۔ داڑان پد، سرمچار آتا نیمہ غا پیش قدمی کروکا فوجی کارندہ غاتے سنگر ہلِسہ سرمچار آک جلہو ٹی ٹک کریر ہرانا سوب آن فوج پدی مننگ آ مجبور مس۔
بلوچستان لبریشن فرنٹ نوشکی، پنجگور و گوادر جلہو تیٹی اِرا ایف سی کارندہ، و اِرا ڈیتھ اسکواڈ نا کارندہ غاتا کھفننگ پولیس چوکی تے آ قوضہ و سرکاری سلاہ تا دوئی کننگ نا زمہ واری ئے ہرفک۔
