بی این پی نا سربراہ سردار اختر مینگل تینا شنگ کروک بیان ئسیٹی پارے کہ اینو سوب ئنا 08 بجہ غا کنے و پارٹی نا بنجاہی سربراہ تے زہری آ ہننگ آن توننگا، ہراڑے ننے سردار نصیر احمد موسیانی نا مار ئنا تعزیت کن ہنوئی اسک۔
او پارے کہ داکان زیات اوسوز نا ہیت دادے کہ سردار موسیانی نا ہرا مارک کہ دزگیر ءُ اوفتے تینا ایلم نا جنازہ ٹی اوار مننگ نا اجازت تننگ افس، پارٹی باسک، ہمدڑد و سنگت آتے سوگوار آ خاہوت تون اظہار تعزیت و اواری آن توننگ ءُ۔ غم ئسیٹی اوار مننگ، جنازہ ٹی اوار مننگ و تعزیت کننگ نہ تنیا اسہ بنیاتی بندغی حق ئسے بلکن ننا چاگڑد و روایت آتا بشخ ئسے، دُن انگا حالیت آتون ننے مشرف نا وخت ئٹی ہم مون تروئی تمتنے۔
او پارے کہ دا سخت پریشانی نا ہیت ئسے کہ جمہوریت نا دعویٰ کروکا نظام بندغ آتے تینا چُنا و مخلوق نا غم تیٹی اوار مننگ نا بنیاتی حق آن محروم کننگ ءِ۔
یات مرے کہ زہری و ہیب کھیب ئٹ ہنوکا کیہی تُو آن پاکستانی فوج ئنا نیمہ آن سخت کرفیو ءِ، ہراڑے منہ دے مُست پاکستانی فوج بی این پی نا رہشون نا اُراغا جلہو کرسا اونا مار ئسے خلک و ایلوفتے تینتون درے۔ زہری کرفیو نا وخت پاکستانی فوج منہ دے مُست سمکاری کرسا اِرا شاری تے خلک و اسہ تُو ئس مُست زہری سوہندہ نا خُڑک یانزدہ جون خننگاسس ہرافتے پاکستانی فوج سُمکاری کرسا خلکَس۔
