بی این ایم نا نیمہ غان 28 مئی آ مروکا ایٹمی تراک آتا برخلاف جرمنی، لندن تون آواران ھنیکن نا نیمہ غان پروگرام اڈ تننگا۔
بی این ایم نا شنگ مروکا درشان نا رد ئٹ شہید راشد( آواران) ھنکین نا نیمہ غان 28 مئی نا رد ئٹ پروگرام ئس اڈ تننگا۔ دیوان ئٹی پاننگا کہ 28 مئی 1998 آ پاکستانی فوج بلوچستان نا آباد انگا علاقہ چاغی ٹی ایٹمی تراک کرے۔ ہرانا سوب آن ہندی بندغ آک تینا اُراتے النگ کن مجبور مسُر و تابکاری نا سوب آن ماحول ئے سخت نسخان مس۔
ہیت کروک آک پاریر کہ دا ایٹمی تراک آتیکن پاکستانی فوج و ریاست منصوبہ و پُہی ئٹ بلوچستان ئے گچین کرے انتئیکہ بلوچستان اسہ کوزہ مروکو ہند ئسے ہرانا بندغ آک کوزہ گیرہ پاکستان کن ہچو معنی ئس تخپسہ۔ دا تراک آتیان پد زوت پوست ئنا کینسر تون پین کیہی ناجوڑیک چاغی و بلوچستان ئٹ شنگ مسُر، ہرافتا ثبوت مننگ آن پد ہم علاقائی و جہانی سطح ئٹ نظر انداز کننگار۔
اندُن بی این ایم نا نیمغان جرمنی و لندن ئٹی 28 مئی نا ایٹمی تراک آتا برخلاف برانز کھشنگا و بندغ آتے دا سرپدی تسُر کہ امر ایٹمی تراک آک بروکا نسل آتے ہم نسخان تیرہ۔
ہیت کروک آک انگریزی و جرمن زبان تیٹ ہیت کریر و پاکستان نا ایٹمی تراک آتیان پد چاغی و ایب کھیب نا ہندی بندغ آتے امرو پریشانی، ناجوڑی، سیاسی زوراکی و بندغی جیڑہ مون تروئی تمنگءِ۔
اوفک پاریر کہ بلوچستان نا ہندیک 28 مئیءِ تینا تاریخ ئٹ اسہ مونءُ دے ئسینا دروشم ئٹ یات کیرہ۔
برانزیک پاکستانی فوج و ریاست نا خلاف نعرہ خلیسہ جہانی مخلوق و یورپی ادارہ تیان خواست کریر کہ اوفک چاغی و بلوچستان نا ایلو ہند آتا مروکا نسل کشی نا بابت ئٹ پٹ و پول کیر۔
