بی ایل ایف نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارے کہ ننا سرمچارک 25 نومبر نا شام ئنا ہشت بجہ غا مشکے نا علاقہ جیبری قلات ئٹی برجاء انگا پولیس چیک پوسٹ آ ہمو وخت جلہو کریر ہراتم اوڑے ڈیتھ اسکواڈ نا کارندہ آتا ساڑی مننگ نا حوال رسینگا۔ جلہو ئٹی ڈیتھ اسکواڈ نا کارندہ علی حسن ولد علی دوست ہمو جاگہ غا خلنگا و رازق ولد محمد امین تون اوار کیہی کارندہ غاک ٹپی مسُر۔
ترجمان پارے کہ بلوچ اُلس نا یات تننگ کن پانہ کہ علی حسن ولد علی دوست، مشکے پروار نا ہندی ئے 2015 ٹی سرمچارک تحریک آجوئی نا برخلاف کاریم کننگ آ دزگیر کریر واہم اونا خاہوت نا نیمہ غان ضمانت آ اودے یلہ کننگا ولے او تینا ایلم تون تحریک آجوئی نا برخلاف ڈیتھ اسکواڈ ٹی اوار مس و علی حسن نا ایلم منہ تو مُست مشکے، کالار ئٹی ہدایت اللہ پنی ءُ بندغ ئسے خلکس۔ علی حسن ڈیتھ اسکواڈ نا سربراہ خداداد نا بھلُنی ٹی دُزی و لٹ و پُل نا ڈوھ تیٹ اوار اسک۔
ترجمان پارے کہ اسہ پین کاروائی سیٹی 13 نومبر آ سرمچارک سوراب نا علاقہ گدر، کغلی نا ہند آ ناکہ بندی کرسا کسر ئے بند کریر و اسنیپ چیکنگ ہم کریر، واہم دا وخت آ ہچو ریاستی کارندہ ئس خلنگ متو۔
ترجمان گہرام بلوچ ایسر ئٹ پارے کہ بی ایل ایف مشکے و سوراب ئٹ مروک کاروائی تا ذمہ واری ئے ہرفک۔
