بلوچ یکجہتی کمیٹی نا مرکزی رہشون سمی دین بلوچ پارے کہ ہنوکا شش تو آن بلوچ یکجہتی کمیٹی نا رہشون ڈاکٹر ماہ رنگ بلوچ، بیبرگ بلوچ، شاہ جی بلوچ، بیبو بلوچ و گلزادی بلوچ ئے سرکار غیر قانودی حساب ئٹ دزگیر کرینے۔
او پارے کہ اونا برخلاف مُست تھری ایم پی او نا وڑ او قانود آتا غیر قانودی کارمرز مس، پدا سیاسی ایف آئی آر تا رد ئٹ بیدس رپورٹ تننگ آن ریمانڈ نا اسہ بھلو لڑ ئس برجاء تخنگا۔ داسا اوفتے جوڈیشل کننگ مسُنے گُڑا اوفتا مروکا پیشی تا بیدس سوب آن ہُرے کننگ ءُ و بیدس سوب آن دا فیصلہ کننگانے کہ داسا اوفتا ایلو پیشیک عدالت نا جاگہ غا جیل ئنا تہہ ٹی مرور۔
او پارے کہ دا ہمو چم آتا لڑ ئے ہرافتیان اُلس ئنا توار ئے توننگ نا کوشست کننگ ءُ۔ دا حکومت اُلسی مخ تفی آن خُلیس نا گواچی ءِ، وختس رہشون تے عدالت ئٹی اُلسی مُخ تفی رسینگک اودے ایسر کننگ کپسہ داسا ہندا چم ئے کارمرز کننگ ءُ کہ بیدس قانونی جواز آن پیشی تے جیل ئٹی تِخنگو۔
سمی دین پارے کہ بی وائی سی دا عمل ئے غیر قانودی و ظلم پُہہ مریک و دا عمل نا برخلاف اسہ آن لائن برانزی مہم ئسینا بناء مسنے ہرا اینو آن مُسہ دے اسکان برجاء مرو۔ دا مہم ئٹی بشخ ہلیسہ تینا برانز ئے ریکارڈ کریفبو و جبر ئنا نظام نا برخلاف توار بُڑز کبو۔
