بلوچستان نا علاقہ جھاؤ و گوادر آن مُسہ بندغ ئے پاکستانی لشکر دزگیر کننگ آن گُڈ بیگواہ کرینے۔
حوال تا رد ئٹ اینو جھاؤ بازار ئٹی واجہ باغ نا ہند آ پاکستانی لشکر نادل بلوچ ولد زباد بلوچ ئے دزگیر کرسہ بیگواہ کرینے۔
خاہوت اونا دزگیری ئے پک کرسا اونا زوت آجوئی نا خواست کرینے۔
ایلو نیمہ غا بلوچستان نا علاقہ پسنی شادی کور آن سردل خان ولد شیر خان و ھاتر ولد میر دوست ئے ہم بیگواہ کننگانے، خاہوت نا رد ئٹ شام ئنا اِرا لاری و پنچ سائیکل موٹر اوفتا اُرانا مونا سلیس، سلاہ بند بندغ آک اُراٹی پیہار و سردل خان ئے زور ئٹ تیتون دریر۔
ہندا وخت زمین تا کاریم کروکا ھاتر ئے ہم فصل آتیان دزگیر کرسا بیگواہ کریر۔
خاہوت نا رد ئٹ اِرٹنگاتہ دزگیری آن پد ہچو حوال یس اف۔ خاہوت اوفتا ڈس و زوت آجوئی نا خواست کرینے۔
